A AETG e AMTEGA mostran este mércores as expectativas de todos os axentes implicados no desafío 5G
martes, 26 de xuño do 2018
Este
27 de xuño toca falar da nova xeración de tecnoloxía móbil, a 5G,
e de todas as cousas que agardamos que traia (e de todas as que nos
gustaría que deixase atrás). Estamos
a falar do foro Oportunidades e retos das redes 5G, organizado
pola Asociación de Enxeñeiros de Telecomunicación de Galicia
(AETG) e máis a Axencia para a Modernización Tecnolóxica de
Galicia (AMTEGA). Segundo indica a asociación profesional que
preside Julio Sánchez Agrelo, trátase do primeiro foro de debate en
Galicia sobre o marco no que se desenvolverán as redes 5G, o impacto
que terán na sociedade galega, os principais retos para a súa
implantación e o potencial do hipersector TIC galego para situarse
neste contexto tecnolóxico emerxente.
A
cita será na Cidade da Cultura, en Santiago, e nela participa a
punta de lanza dos operadores e fabricantes dos mercados estatal e
europeo e, tamén, algunha das administracións públicas máis
directamente implicadas.
O
encontro, engade a AETG complementando a
información que achegamos os días pasados sobre o foro dende Código
Cero, diríxese a mostrar e compartir os puntos de vista, as
inquietudes e as expectativas “de todos os axentes implicados”.
Por este motivo, está estruturado en diferentes bloques para dar voz
a operadores, fabricantes, clientes, administracións públicas e
entidades que están a traballar xa en iniciativas de 5G.
Como
punto de partida o primeiro bloque do encontro será un relatorio
sobre que son as redes 5G da man de José Carlos López Ardao,
profesor da Escola de Enxeñería de Telecomunicación da
Universidade de Vigo.
O
segundo bloque abordará o marco estratéxico ante o desafío 5G co
relatorio dun representante da Secretaría de Estado para a Sociedade
da Información e a Axenda Dixital.
De
seguido celebrarase unha mesa redonda na que Antonio Fernandez,
responsábel do Programa Innovación 5G produto en PSA; Benigno
Rosón, subdirector xeral de Sistemas e Tecnoloxías da Información
da Consellería de Sanidade; e Ana Ulloa, xefa de Explotación en
Autoridade Portuaria de Vigo, abordarán as posibles aplicacións, as
oportunidades e os beneficios que esperan do desenvolvemento das
redes 5G en Galicia.
O
terceiro bloque centrarase nas perspectivas das redes 5G desde a
visión dos operadores e os fabricantes. Didier Clavero, responsábel
de Data Core Vodafone; Tomás Alonso, director de Enxeñería de
Produto de Orange; Javier Gutiérrez, director de Estratexia e
Desenvolvemento de Rede e Infraestruturas de TI de Telefónica; e
Norberto Ojinaga, director de Rede de R, exporán o papel que
desempeñarán as 5G na economía e a sociedade e as perspectivas e
problemáticas que ven sobre o seu despregamento.
A
mesa redonda dos fabricantes achegará a súa visión do futuro das
redes 5G e as posibilidades de uso coa participación de Iván Rejón.
responsábel de mercadotecnia, comunicacións e relacións coa
industria e os gobernos de Ericsson; Álvaro Sánchez, responsábel
de Telefónica Account at Nokia; José Capote, xefe de vendas de
solucións integradas de Huawei Technologies; e José Nicolás
Domínguez-Staedke, xefe de desenvolvemento de negocio e estratexia
en Colmena.
O
cuarto e último bloque servirá para expoñer iniciativas
específicas de uso do 5G da man de entidades que están xa
desenvolver solucións concretas. Nesta mesa participan Francisco
Sánchez Pons, director de ITS e Electrónica en CTAG; Yudani Riobó,
responsábel de Innovación en Quobis; Luis Pérez Freire, director
xeral de Gradiant e Céctor Estévez, director xeral de Centum
Research & Technology.
A
celebración deste foro enmárcase nas iniciativas promovidas pola
Axenda Dixital de Galicia 2020, que ten como obxectivo prioritario
contribuír a transformación dixital da Comunidade.