A Cámara da Coruña impulsa a transformación dixital de máis de 200 pemes da área
luns, 3 de xaneiro do 2022
A
Cámara de Comercio da Coruña vén de facer balance da actividade
xerada pola súa Oficina
Acelera Peme, impulsada o pasado verán ao abeiro do programa de
oficinas de transformación da entidade estatal Red.es. Segundo fixo
saber, dende a súa posta en funcionamento, no mes de xullo, 60
empresas xa están a traballar de maneira continua mellorando os seus
procesos de dixitalización. Amais, a oficina organizou 6 xornadas
online que contaron con máis de 160 participantes.
A
oficina atende de xeito personalizado e de balde a pequenas e
medianas empresas, micropemes, autónomos e emprendedores da área da
Coruña interesadas en comezar ou en avanzar na súa transformación
tecnolóxica, pero tamén axuda a pemes fornecedoras de ferramentas
TIC a introducir os seus produtos e solucións no mercado. “Deste
xeito, calquera autónomo ou pequena empresa pode recibir unha
orientación personalizada de profesionais cualificados sobre as súas
necesidades que lle permita incorporar novos servizos dixitais á súa
carteira”, explicaron fontes da Cámara, engadindo que ao longo
deste período a entidade asesorou a empresas interesadas en mellorar
o seu posicionamento en redes e buscadores, na realización de
estratexias de mercadotecnia dixital, na axilización dos procesos de
xestión cos seus clientes, na automatización de trámites ou na
xestión de expedientes.
Un
dos ámbitos temáticos que suscitou meirande interese entre as
empresas e profesionais foi a ciberseguridade (o que motivo que se
lles achegasen recursos para actualizar e mellorar as operativas dos
postos de traballo evitando riscos e vulnerabilidades), seguida de
preto pola implementación de melloras tecnolóxicas, como
plataformas de teleformación, impresión 3D ou Intelixencia
Artificial, entre outras.