A Deputación de Lugo abre o 22 o prazo de preinscrición para o novo curso de audiovisual e TIC
xoves, 11 de xuño do 2020
O
Centro de
Formación Audiovisual da Deputación de Lugo, a antiga Escola de
Imaxe e Son da Fundación TIC, anunciou que o 22 de xuño abrirá o
prazo de preinscrición para o curso 2020-2021. Serán 20 prazas
por ciclo e as matriculas, ademais, achegaranse novamente de balde
(por décimo terceira vez consecutiva). Esta achega formativa é
froito da aposta da Deputación “por un ensino de calidade e en
igualdade de condicións para toda a mocidade da provincia interesada
en formarse no eido audiovisual e tecnolóxico, “con independencia
da situación económica das súas familias”.
As
persoas interesadas atoparán o impreso de preinscrición na sede do
centro e na web da
Deputación, trala publicación definitiva de admitidos, a
matrícula ordinaria poderá formalizarse do 15 ao 30 de xullo.
A
Deputación ofrece 20 prazas para cada un dos ciclos, aínda que este
número queda condicionado pola evolución da COVID-19, así como a
organización das clases en quendas de mañá e tarde, “co
obxectivo de garantir a seguridade do alumnado e do persoal do centro
formativo”, explicou o ente provincial, engadindo que o prazo de
preinscrición estará aberto do 22 de xuño ao 3 de xullo. O 7 de
xullo publicarase, no taboleiro de anuncios do centro e na web da
Deputación, a listaxe provisional de admitidos, de solicitantes que
quedan en listaxe de espera e de excluídos. Do 8 ao 10 será o prazo
para as reclamacións, e o día 14 publicarase a lista definitiva de
admitidos, en espera e excluídos. A matrícula ordinaria poderá
formalizarse do 15 ao 30 de xullo no centro educativo, en horario de
9.00 a 14.00 horas.
550
titulados cunha formación personalizada
Desde
a posta en funcionamento da antiga Escola de Imaxe e Son en 2003,
arredor de 550 mozos e mozas son titulados dos ciclos de Produción e
Realización do centro dependente da Deputación. O seu modelo
formativo inclúe un importante número de prácticas en escenarios
reais ao longo de todo o curso, nas que o alumnado se enfronta ás
esixencias que atopará cando acceda ao mercado laboral. O CFA conta
cun profesorado altamente cualificado apoiado por técnicos
profesionais con ampla experiencia no eido audiovisual, e unhas
instalacións e dotacións modernas, con platós e salas de
realización e son.
