A ESEI da UVigo pechou 2021 propiciando unha manchea de ofertas de emprego para o alumnado
martes, 25 de xaneiro do 2022
A ESEI (Escola Superior de Enxeñaría Informática) da
Universidade de Vigo (Campus de Ourense) rematou o ano co peche da V edición do seu Foro de Emprego,
recuperando a iniciativa nun formato híbrido tras este ano e medio
de pandemia onde non se puido realizar.
Nesta
edición participaron de xeito presencial unha vintena de empresas do
ámbito TIC de Galicia e en palabras do seu director Francisco Javier
Rodríguez, “esta iniciativa axuda a visibilizar nun curto prazo de
tempo a dimensión real das posibilidades de emprego que teñen os
nosos alumnos e onde eles mesmos comproban que a dificultade reside
en decidir ben o seu plan de carreira, non en atopar traballo”.
A
dinámica do foro foi centrada en marcar e organizar entrevistas
directas entre empresas e alumnado de forma que durante estas 2
semanas realizáronse máis de 360 entrevistas sendo a media de
entrevistas ás que asistiu cada alumno de 7. Ao abeiro da actividade
xeráronse 60 ofertas laborais.
Aínda
que as expectativas de emprego son así de optimistas, desde a ESEI
séguese a traballar para “maximizar as posibilidades de acertar
nesa carreira profesional ofrecendo distintas actividades formativas
en tecnoloxías disruptivas e de actualidade ao seu alumnado e á
sociedade”.
De
feito, o pasado mes de decembro remataron varias accións formativas
extracurriculares realizadas en conxunto con distintas entidades e
institucións de Galicia como o Colexio Profesional de Enxeñaría
Informática de Galicia, a Deputación de Ourense, o Concello de
Ourense, o capitulo español da IEEE Computer Society, a Axencia de
Modernización Tecnolóxica da Xunta de Galicia (AMTEGA), a
asociación de alumnado UVigoMotorSport, a asociación de empresas
promotoras de tecnoloxías Blockchain de España Alastria e
máis de 20 entidades empresariais do ámbito das TIC.
Intelixencia
Artificial
espérase
para setembro de 2022
Respecto
das novas titulacións de grao e mestrado en Intelixencia Artificial,
Francisco Rodríguez indica que “se seguen os trámites
correspondentes na Xunta de Galicia onde xa se entregaron as memorias
dos devanditos estudos” e “prevese que comecen en setembro do
próximo ano 2022”. Haberá na Universidade de Vigo, en Ourense, 50
prazas para o grao en Intelixencia Artificial e 20 prazas para o
Master. A previsión é que a páxina web do centro, esei.uvigo.es,
acubille en marzo toda a información correspondente ás ditas novas
titulacións xunto coas autorizacións definitivas.