A ONU presenta un xogo en liña para loitar contra os desastres naturais

xoves, 1 de marzo do 2007 Raquel Noya

A Oficina para a Redución de Desastres das Nacións Unidas, vén de presentar Stop disasters (Deteñamos os desastres), un videoxogo que ten como obxectivo amosarlle á mocidade vieiros para implementar nos lugares onde viven medidas preventivas ante o risco de desastres naturais. Este videoxogo, que non ten nada que ver cunha boa parte das últimas novidades do mercado nas que máis ben se colabora no desastre no canto de detelo, vai destinado a rapaces e rapazas de entre 9 e 16 anos e recrea cinco escenarios de catástrofes: un tsunami, un furacán, un asolagamento, un incendio forestal (apropiado para os nosos cativos) e un terremoto.
Respectando un determinado orzamento (seguramente limitado), o xogador ten que construír vivendas, hospitais e infraestruturas sólidas nos lugares máis axeitados co fin de salvagardar á poboación e prever danos ante a posible chegada dun desastre natural. Ó final do xogo, o usuario obtén máis ou menos puntos en función do número de vidas que logrou salvar logo de que se produza a desfeita.

PUBLICIDADE