A Rede de Dinamización entrega os galardóns do seu Concurso de Iniciativas
mércores, 17 de decembro do 2008
A Rede de Dinamización da Sociedade
da Información vén de facer entrega, onte martes día 16 de decembro, dos
galardóns correspondentes ao seu II Concurso de Iniciativas que levou a cabo
por segundo ano consecutivo con motivo do Día das Letras Galegas, o Día de
Internet e o Día Mundial das Telecomunicacións e da Sociedade da Información.
O evento tivo
lugar no Centro Comarcal do Salnés, na localidade de Cambados e contou coa
presenza de Montserrat Prado Cores, delegada da Consellaría de Innovación e
Industria en Pontevedra e de Emilio Manuel Martínez Rivas, xerente da Sociedade
de Desenvolvemento Comarcal, entre outras personalidades.
Os colectivos aos
que se dirixiu este evento foron a empresa, as mulleres, os maiores, as persoas
con discapacidade, o software libre, as asociacións e a poboación en xeral; e a Rede de
Dinamización convocouno para dar conta de dous obxectivos claros: por unha
banda, pretendíase vincular a cada un destes colectivos co galego así como
incrementar a percepción do noso idioma como unha lingua útil no eido das Novas
Tecnoloxías, e por outra, darlle pulo ao
emprego das TIC nas actividades cotiás e profesionais de cada un dos devanditos
colectivos.
Podemos dicir,
pois, que o obxectivo principal deste II concurso de Iniciativas era “visualizar e pór en valor a sinerxía que se
produce na conxunción das TIC co galego”. As iniciativas que optaban aos
galardóns debían contemplar os seguintes obxectivos específicos:
Fomentar o uso
do galego nas TIC.
Promover
iniciativas que, mediante o emprego das TIC, permitan a cada un dos colectivos
participar activamente no desenvolvemento da Sociedade da Información.
Proporcionar
aos/as dinamizadores/as unha ocasión para desenvolver o seu talante innovador e
emprendedor, en prol de achegar o uso do galego e das TIC aos colectivos
obxectivos.
Impulsar a
realización de actividades encamiñadas a potenciar a implicación activa do/a
dinamizador/a no contorno da súa entidade colaboradora.
Nesta convocatoria,
na categoría de Software Libre, a iniciativa vencedora foi o proxecto, II
Xornadas de Software Libre: Software Libre e Asociacións, que se celebrou o 5 de maio na Casa da Cultura Manuel
Lueiro Rei, no Grove, e na que se abordaron aspectos como o Software libre e
Asociacións, Ferramentas de Software Libre: Mozilla Firefox, Thunderbird, GRUVI
(cesión de equipos obsoletos da Universidade de Vigo a entidades social totalmente
equipados en Software Libre), virtualización de Linux sobre Windows e mitos
sobre Linux.
Tamén se
presentou a proposta da creación dun Portal Web para as asociacións da comarca
(por parte da Sociedade Comarcal). A xornada foi levada a cabo por Ana María
Rosales García, dinamizadora no Concello do Grove, Ana Lorenzo Rivas,
dinamizadora no Concello de Sanxenxo, Alberto Fandiño Mariño e Eliana Bouzas
Collazo, dinamizadores no Centro Comarcal do Salnés.