A Xunta e a UDC impulsarán formación conxunta en tecnoloxías emerxentes
luns, 17 de xaneiro do 2022
A
UDC e a Xunta formalizaron este luns 17 de xaneiro unha alianza para
traballar nas posibilidades laborais que ofrecen as tecnoloxías de
emerxentes á nosa xuventude, acurtando as distancias entre aquelas e
as novas xeracións. O
acordo de colaboración foi asinado pola conselleira de Emprego e
Igualdade, María Jesús Lorenzana, e o reitor da Universidade da
Coruña (UDC), Julio Abalde. O protocolo permitirá articular
convenios de colaboración no eido da formación durante os próximos
catro anos. Porase o foco na Intelixencia Artificial, no Big Data
ou na Realidade Aumentada, entre outros ámbitos.
A
Xunta e a Universidade comprométense, deste modo, a fomentar o
intercambio de experiencias e de persoal nos eidos da docencia e a
formación, dentro daquelas areas nas cales ambas as dúas teñan
interese manifesto.
A
alianza, sinalaron, “facilitará o intercambio de profesionais e
docentes e promoverá a participación conxunta en proxectos e
programas de investigación”. A cooperación materializarase
ademais no desenvolvemento de programas de formación de persoal
técnico e/ou docente, no asesoramento mutuo entre Xunta e a
universidade herculina ou no intercambio de publicacións e materiais
de investigación.
Lorenza
lembrou que o Goberno galego atópase neste intre na recta final dun
estudo específico sobre as necesidades formativas en tecnoloxías
emerxentes do mercado galego de traballo. “Trátase de afinar nas
necesidades de formación que esixe o contexto actual en materia de
novas tecnoloxías en 15 sectores estratéxicos”, dixo, engadindo
que con esta iniciativa, “buscamos dar resposta axeitada á
transformación de determinados postos de traballo e perfís que se
están a requirir”.
Entre
as necesidades xa detectadas, dixo, “cumprirá afondar na
aprendizaxe constante, na progresiva incorporación de perfís
tecnolóxicos e de formación dixital ao mercado, e no recoñecemento
de novas competencias como as vencelladas coa análise da información
a gran escala (Big Data), a Intelixencia Artificial ou a
Realidade Aumentada, entre outras.