A aplicación Ferrol da Ilustración permítenos viaxar á Galicia do século XVIII
xoves, 21 de maio do 2020
As
novas tecnoloxías que nos permiten coñecer mellor a realidade
avanzan sen pausa na nosa terra, en parte pola tendencia natural do
turismo e a cultura a dixitalizarse e experimentar, en parte porque
as circunstancias actuais (a crise sanitaria) non fan máis que
confirmar o empuxe das ferramentas novas e as súas vantaxes. Estes
ingredientes (experimentación, dixitalización, lecer) están na
base da aplicación móbil Ferrol da Ilustración, que nos
permite viaxar ao esplendor da cidade galega no século XVIII, cando
se converteu en referente humanístico, artístico e urbanístico.
A
app, ideal para ser xogada en familia, percorre os monumentos
principais da histórica cidade “dunha forma diferente e
divertida”, informan os seus desenvolvedores, engadindo que estará
dispoñíbel de balde para Android, no Google
Play, e para iOS, na
Apple Store. “Grazas a este xogo, que contén personaxes e
datos reais, o usuario poderá descubrir a historia de Ferrol, ligada
ao mar, á construción naval e á Coroa de España, durante os seus
paseos en espazos abertos”, engaden os autores do xogo, que poñen
o foco no potencial da ferramenta para emprazar a cidade galega na
vangarda tecnolóxica.
A
aplicación vén da man da Sociedade
Mixta de Turismo de Ferrol e ten un importante interese, tanto
para residentes como para visitantes, neste días de confinamento,
nos que se presenta como “unha ferramenta perfecta para coñecer
dunha maneira distinta toda a historia, personaxes e curiosidades da
cidade”.
Ferrol
da Ilustración
A
ferramenta, que nos permite viaxar ao século XVIII, inclúe un mapa
en 3D que é o escenario de partida para percorrer, da man do Marqués
da Ensenada ou María de Castro, a Ruta da Ilustración. Amais,
levaranos da man polo Barrio da Magdalena, declarado conxunto
Histórico-Artístico, de paseo polo estaleiro de Navantia ou o
Arsenal militar, Ben de Interese Cultural e aproximaranos á praza de
Amboage, un dos grandes centros neurálxicos da cidade. “Cun só
toque na pantalla do móbil poderemos comparar o Ferrol de hoxe en
día co que coñeceron aqueles valentes mariñeiros que conquistaron
outras augas”, explican os responsábeis da ferramenta, poñendo o
foco nos retos que a aplicación pon ao alcance da nosa man, cos que
poderemos obter puntos e recadar datos dos sitios que visitamos,
fotografías ou puntos patrocinados.
Vídeo promocional da aplicación