A aplicación Ximnasio dos verbos axúdanos a optimizar o noso nivel de galego
venres, 12 de maio do 2017
Estes
días soubemos dunha aplicación que vén moi a conto estes días por moitos motivos, a aplicación Ximnasio
dos verbos. Primeiro, por ser unha ferramenta
móbil que facilita a aclara o camiño cara a aprendizaxe da nosa
lingua. Segundo, porque estamos a piques de entrar na semana por
excelencia de celebración do noso (o antes, o durante e despois do
17 de maio, Día das Letras Galegas, tamén Día Internacional da
Internet). Terceiro, porque é un recurso que normaliza o galego alí
onde é máis preciso: nas redes, lugar de encontro por excelencia da
mocidade. Ximnasio dos verbos vén da man do
lectorado de galego da Universidade de Heidelberg,o que aínda lle
achega á app un cuarto extra de significado. O
cometido da ferramenta é introducir aos usuarios nos verbos
irregulares do galego. Segundo nos contan os autores, trátase
dun proxecto docente para axudar á alumando galego e estranxeiro a
“perderlle o medo aos novos verbos”.
A
ferramenta vén artellada en catro fases (procurar, trucos,
adestramento e xogos), cada unha delas cun cometido clarificado de
seu, a xeito de camiño formativo dende a teoría até a práctica,
dende a base até o cumio (o exame final co que poderemos comprobar
até que punto estamos “en forma” en materia de coñecemento
verbos galegos e dominio da eficacia vocálica). Respecto deste
último, a app mesmo nos permite escoitar como soan as
palabras de meirande complexidade.
Por
certo que un dos puntos máis salientábeis da ferramenta móbil é
que complementa a andaina formativa cun toque retranqueiro que é moi
de agradecer e que, a pouco que nos fixemos, veremos que comeza co
título mesmo (ese ximnasio lingüístico onde adestrar algo máis
que músculos: o noso nivel de galego).
Ximnasio
de verbos é unha aplicación de desenvolvemento galego froito do
traballo docente de Gabriel Pérez Durán e Óscar Rivas González
para o Romanisches Seminar da Universität Heidelberg, en Alemaña.