A crise e a corrupción, no punto de mira dunha nova revista dixital galega: Enchufados

Tira de Sabela Arias vista na nova páxina

Cando todo vai mal (e sen arela de ser negativistas, semella que todo vai realmente mal), nada mellor que o humor. Iso sabémolo ben aquí, afeitos como estamos a todo tipo de males e a buscar vías de escape na liberación que é rir e facer rir. En base a isto, unha web como Enchufados, posta en marcha este mes de maio e coincidindo coa dupla celebración das nosas Letras e do noso Internet (porque tamén é noso e tamén se celebra o 17 de maio), semella especialmente oportuna. Trátase dunha revista de humor, colectiva, onde se celebra todo o que ten que ver co noso, até algo tan típico (por desgraza) como o enchufismo.
Así nolo contan os responsábeis da nova publicación dixital: “En Galicia temos campo, bosque, monte e carballos, rías, illas, praias, vento e choiva. (...), pero sobre todo temos enchufismo e humor, moito humor”. A web até fai mofa do intre xusto no que se pon en marcha: “Vale que non sexa o mellor intre para comezar, con isto da crise, pero a nós gústanos o humor e rir por enriba das nosas posibilidades”.
O equipo de redacción tamén ten o seu. De feito, está comandado polo mesmísimo presidente da Deputación (Euler) e conta cunha nutrida escolma (non arbitraria) de xente elixida a dedo: Sabela Arias, Boli Bic, Xoán Andrade, Eva Domínguez, Barón Rojo e Pepe Mansilla. A revista en liña tómalle o pulso á actualidade con retranca e cun aquel de canle informativa que confirma que, en ocasións, o punto de vista do humor é máis informativo que o punto de vista obxectivo do xornalismo en sentido estrito. De feito, as tiras cómicas que se achegan estes días dende a web son unha crónica a pé de rúa e de primeira man, das consecuencias que está a ter a crise na nosa terra. Iso si, con humor.