A dixitalización, gran protagonista do Premio PEME do Ano 2022 da Coruña
xoves, 30 de xuño do 2022
A
empresa Gabadi adicada ao
sector naval e con sede en Narón, recibiu este xoves 30 de xuño o
Premio PEME do Ano 2022 da Coruña, galardón que conceden o Banco
Santander e as Cámaras de Comercio de Santiago de Compostela e da
Coruña, en colaboración coa Cámara de España e o diario La Voz de
Galicia. O director executivo (CEO) da Empresa Gabadi, Antonio José
Llago Hermida, foi o encargado de recoller o recoñecemento, nun acto
que se celebrou na sede da Cámara de Comercio de Santiago.
Valorouse, entre outras cousas, o espírito de transformación e
dixitalización da empresa.
O
acto contou coa presenza do vicepresidente da entidade cameral
santiaguesa, José Carballo García, e o director xeral da Cámara de
Comercio da Coruña, Manuel Galdo Pérez ademais do alcalde de
Santiago, Xosé A. Sánchez Bugallo; o presidente da Deputación da
Coruña, Valentín González Formoso; o director xeral de Comercio,
Manuel Heredia Pérez; a directora territorial do Banco Santander en
Galicia, Rocío Pazos Toba e; o director da Voz de Galicia, Xosé
Luís Vilela Conde.
Segundo
fixeron saber as entidades camerais da Coruña e Santiago, Gabadi é
unha empresa do sector naval, que se esforza diariamente para
proporcionar aos seus clientes produtos e servizos de calidade,
respectando ao máximo o medio ambiente, mediante a implementación
dos sistemas máis sustentábeis”. Amais, salienta polo seu
compromiso coa I+D+i e pola súa crecente presenza internacional.
O
xurado valorou especialmente de Gabbadi “a súa achega á creación
de emprego, ás accións de formación, internacionalización,
innovación e dixitalización, así como a inclusión de proxectos
sustentábeis como parte da estratexia da empresa en 2021”, como
méritos para alzarse con este premio.
Ademais,
concedéronse catro accésits nas categorías de Internacionalización; Innovación e Dixitalización; Formación e Emprego; e Empresa Sustentábel.
Accésits
a Ineltron, Bionix, Dimalnox
O
Accésit de Internacionalización outorgouse á Empresa Ineltron,
especializada na prestación integral de servizos de enxeñería,
montaxe, posta en marcha e mantemento de sistemas eléctricos, de
instrumentación e control en plantas industriais.
Pola
súa banda, o Accésit de Innovación e Dixitalización, recaeu en
Bionix, que simplifica o traballo dos profesionais da cadea de
subministro de todo o mundo optimizando a loxística de entrada e
saída, as vendas en liña, a xestión de inventario unificado e
rendemento dos provedores.
O
Accésit á Formación e o Emprego concedeuse á Dimalnox, empresa
innovadora especializada na carpintería metálica, “cunha gran
capacidade de fabricación, que garante aos seus clientes
subministros de xeito estábel, satisfacendo en todo momento calquera
demanda coa maior puntualidade nas entregas, achegando o saber facer
e a calidade dos seus produtos”.
Por
último o Accésit de Empresa Sustentábel da Coruña foi para Acctia
Ambiental, que deseña e xestiona solucións integrais que favorecen
a sustentabilidade das industrias, a economía circular e a loita
contra o cambio climático.
A
empresa Gabadi concorrerá ao Premio Nacional PEME do Ano 2022, que
se elixirá entre os gañadores de cada provincia. O nome coñecerase
nos primeiros meses de 2023, nun gran acto que se celebrará en
Madrid. Así mesmo, os gañadores dos Accésits concorrerán tamén á
final nacional nas súas respectivas categorías, onde se elixirá ás
empresas que destacaron polas súas accións de Internacionalización,
as súas políticas de formación e emprego ou innovación e
dixitalización e as que teñen implantadas máis medidas de
Responsabilidade Social Corporativa (RSC). Nesta nova edición, a
sexta deste premio, participaron máis de 1.7766 empresas de todos os
sectores produtivos.