A eSaúde e o procesamento da linguaxe natural foron os eixes do novo Almorzo TIC Talk do CITIC

Este martes 30 de maio tivo lugar na Sala Cloud do CITIC (Centro de Investigación TIC da UDC) unha nova sesión dos Almorzos TIC Talk. A xeira de divulgación contou desta volta coa participación da investigadora Beatriz Piñeiro Lambas e o investigador Alberto Muñoz Ortiz.
En primeiro lugar, Beatriz Piñeiro presentou Modelos de curación: unha aplicación ao estudo da cardiotoxicidade en paciente con cancro de mama. A súa investigación baséase nun estudo estatístico que mide a probabilidade de padecer cardiotoxicidade en mulleres que reciben tratamentos potencialmente cardiotóxicos. Segundo explicou a investigadora do CITIC “a clave está en poder estimar, en función das variábeis clínicas que obtemos a través de técnicas ecocardiográficas denominadas Doppler, a probabilidade de padecer cardiotoxicidade, así como coñecer o tempo que pode transcorrer ata que a paciente desenvolve a doenza”.
Pola súa banda, Alberto Muñoz Ortiz, coa súa charla Natural language processing for low-resource languages, mostrou a súa investigación centrada no desenvolvemento de tecnoloxías efectivas de aprendizaxe automática e procesamento da linguaxe natural (PLN) que sexan capaces de comprender linguas minoritarias ou para as que exista unha escaseza de recursos.
Os Almorzos TIC Talk son unha iniciativa da comisión de formación do CITIC que teñen o obxectivo de potenciar a tranversalidade das investigacións e promover posibles colaboracións entre persoal investigador que se atopa nas primeiras etapas da súa carreira investigadora.