A finais de mes Sony lanzará un servizo Premium para a PS3

venres, 18 de xuño do 2010 Marcus Fernández

Inicialmente moitos consumidores criticaban o feito de que para poder xogar en liña dende a Xbox 360 fose preciso ser usuario Gold, ou sexa, de pagamento, pero ao ver o mal funcionamento do xogo en rede da PlayStation 3 cambiaban de idea, e vían que as cotas do servizo eran un bo investimento, algo que dende Sony queren cambiar e, mantendo o seus servizos actuais, van estrear o 29 de xuño PlayStation Plus, un servizo Premium que poderá contratarse trimestral ou anualmente e que, aparte de maior calidade de servizo, engadirá extras para animar aos usuarios a subscribilo: un mínimo de 4 xogos de balde ao mes (1 título de PSN, 2 minis e un clásico de PS One), descontos, demostracións descargables, avatares e temas que ao longo do ano deberán superar un valor de 200 euros; a posibilidade de, aparte dunha demo, poder descargar un xogo completo e poder xogar a el durante unha hora para decidir se paga a pena a súa adquisición; e un sistema de descargas automáticas (podendo programarse a descarga de actualizacións, demos e outros contidos de xeito automático, sen ter que estar pendente da aparición das distintas descargas).


Vídeo de presentación de PlayStation Plus

PUBLICIDADE