A galega INEO representará ás pequenas e medianas empresas na Iniciativa Española de Software e Servizos
mércores, 27 de xuño do 2012
- Jorge Cebreiros, presidente da asociación galega INEO
A asociación INEO vén de obter un
importante recoñecemento ao seu labor de impulso ás nosas empresas tecnolóxico-dixitais,
unido á procura constante dunha maior cohesión e actividade conxunta. Máis polo
miúdo, a entidade con sede en Vigo foi elixida como representante das pequenas
e medianas empresas (PEME) no novo Comité Xestor de INES, a máis senlleira rede de cooperación
científico-tecnolóxica de España. A elección da asociación galega ten a súa
raizame na súa estratexia de achegamento ás institucións nacionais e europeas máis
salientábeis para o sector TIC, co obxectivo de “defender e posicionar os intereses das empresas deste eido”,
sinalan fontes de INEO.
Lembrar que INES, Iniciativa Española de Software e Servizos, é unha
rede de traballo científico-tecnolóxica que abrangue aos axentes tecnolóxicos máis
destacados do eido estatal, entre os que atopan empresas e asociacións
empresariais, universidades, centros de investigación e organismos públicos. Na
sétima edición da súa asemblea xeral, que se celebrou os pasados 5 e 6 de xuño
no Parque Tecnolóxico Walqa, aprobouse a nova configuración para o período
2012-2014 do Comité Xestor, órgano que ten como misión organizar, xestionar e
adoptar decisións sobre as actividades e a difusión desta rede. O Comité está
integrado por dez membros, catro representantes do mundo da empresa e seis de
organismos de investigación. Nesta orde cousas, INEO intégrase entre os que
representan o tecido empresarial, asumindo como tarefa principal trasladarlle á
rede a visión particular das PEME. Ao carón de INEO traballarán Atos, Answaretech
e Sadiel (dentro do grupo de empresas) e Tecnalia, a Universidade Politécnica
de Madrid, a Universidade de Sevilla, Universitat Politècnica de Catalunya, o Instituto
Tecnolóxico de Informática e o Instituto Tecnolóxico de Aragón (dentro do grupo
de organismos de investigación).
A asociación galega está a recibir con ilusión este recoñecemento. A xuízo
de Jorge Cebreiros, presidente de INEO, “é
moi importante que as empresas galegas tomen conciencia de que deben colaborar
a nivel nacional e europeo, posto que serán os nosos compañeiros de viaxe
naturais no proceso de internacionalización, á vez que nos axuda a sermos máis
competitivos e, por suposto, a estar na vangarda da innovación”. No seu punto
de vista, a nosa terra ten moito “que
dicir no panorama de innovación nacional e a nosa presenza na plataforma
española máis importante para o noso sector era algo absolutamente
imprescindible”.
A elección de INEO como membro do comité,
engade, supón un paso adiante na súa estratexia de achegamento ás institucións
nacionais e europeas. Este logro, comenta, é o segundo gran logro que acada
INEO a través desta estratexia concreta, trala elección de Jorge Cebreiros, precisamente,
como presidente da Confederación Española de Empresas de Tecnoloxías da
Información, Comunicacións e Electrónica (CONETIC) para os vindeiros dous años.
Con isto, “a nosa asociación reforza o
seu papel como representante das empresas TIC de Galicia nos ámbitos exteriores,
potenciando a busca de mercados e defendendo os seus intereses nas institucións
e máis nos foros nos que se toman decisións relevantes para o desenvolvemento
do tecido TIC”.