A galega LambdaStream colaborará na emisión a móbiles da feira IBC de Amsterdam
mércores, 22 de agosto do 2007
A empresa da Coruña LambdaStream segue os seus periplos internacionais co obxecto de dar a coñecer a súa tecnoloxía e abrirse camiño nun mercado a todas luces concorrido abondo. Desta volta, cómpre dicir que participará na International Broadcasting Convention (IBC) de Amsterdam, onde presentará os seus traballos en materia de soportes e servizos de televisión dixital e, amais disto, participará na emisión con tecnoloxía DVB-H das actividades da dita feira. A transmisión dos eventos deste encontro, un dos máis importantes do sector a nivel mundial e que convoca este ano a 45.000 persoas de 130 países, terá como receptores ós dispositivos móbiles dos participantes na feira, que poderán seguir en tempo real as distintas canles de TV. Para esta iniciativa en concreto, LambdaStream colaborará coa firma SIDSA, provedora de tecnoloxía para TV dixital.
Segundo informa a empresa galega, xa non é a primeira vez que concorre na xuntanza IBC. De feito, o ano pasado LambdaStream acudiu co obxecto de presentar os seus produtos en materia de Televisión Dixital Interactiva e TV polo móbil, en particular dando a coñecer VoDKA, “un sistema de altas prestacións para a distribución de vídeo baixo demanda”.