A nova web turística de Ribeira, seleccionada para o Smart City Expo World Congress
xoves, 17 de xullo do 2014
A nova plataforma web turística de Ribeira, unha
tecnoloxía inserida no ámbito das Smart City da
que falamos en detalle en Código Cero dando conta do traballo
despregado pola empresa galega Avansig, vén de ser seleccionada
como recurso representativo das devanditas Cidades Intelixentes no
evento Smart
City World Congress de Barcelona. Segundo fai saber o Concello,
trátase dun dos encontros internacionais máis importantes da
temática das novas tecnoloxías da información, os espazos urbanos
conectados e o fogar dixital. A feira celebrase entre os 18 e 20 de
novembro na Fira.
A nova da participación do servizo desenvolvido por
Avansig e promovido polo Concello de Ribeira foille comunicada a este
último pola propia organización feiral esta mesma semana. “Antes”,
sinala o Goberno local, “tivo que superar unha durísima criba con
outras iniciativas”.
Segundo engaden fontes do Concello, os trazos máis
característicos da plataforma turística serán amosados en detalle
ao longo dunha quenda de presentación que durará algo máis dunha
hora, compartida con outros tres ou catro proxectos tamén escolmados
para a ocasión. A previsión é que os responsábeis de Avansig
acudan ao evento xunto con representantes do Concello. Entre os
puntos fortes da plataforma que presumíbelmente salientarán atópase
a súa aposta por integrar diferentes tecnoloxías de última
xeración co obxecto de “proporcionar unha comunicación fluída
entre cidadáns, administración, turistas, comerciantes e
empresarios”.
Como lembraremos, a plataforma seleccionada para
participar no evento da Fira barcelonesa tira partido de varios
elementos das tecnoloxías actuais de vangarda. Por un lado a Rede e
as tecnoloxías móbiles e por outra banda as Tecnoloxías de
Información Xeográfica. O resultado é un Visor
SIX Web e dúas aplicacións móbiles (Smart Riveira e
Turismo Riveira) dispoñíbeis para calquera usuario, ademais
dun panel de control que permite a xestión e administración do
conxunto da plataforma por parte dos técnicos do concello. E que se
pode facer a través deste recurso desenvolvido por Avansig? Pois
todo tipo de cousas relacionadas co ámbito das Smart Cities,
informa a empresa, dende comunicar á Administración calquera tipo
de incidencia a través do móbil até acceder mediante códigos QR á
información de realidade aumentada dos atractivos turísticos de
Ribeira, pasando por coñecermos ofertas de locais de hostalería e
vindeiros eventos, consultar mapas ou reservar aloxamentos.