A tecnoloxía galega Situm COVID-19 engade seguridade ás industrias na desescalada
martes, 26 de maio do 2020
A
firma galega Situm, impulsora do innovador sistema do mesmo nome para
a localización e navegación en espazos interiores, vén de pór un
importante gran de area para fortalecer a fronte innovadora de loita
contra a COVID-19. E fíxoo adaptando a súa tecnoloxía para o
retorno á nova normalidade empresarial e para unha necesidade que
vai parella a este proceso: a necesidade de garantir a seguridade dos
persoais laborais e evitar deste xeito novos rebrotes. Deste
obxectivo de axudar a industria a automatizar todos os protocolos de
actuación xorde Situm COVID 19.
O
alicerce desta novidade radica en Situm MRM, a solución da empresa
para a xestión de recursos humanos e activos móbiles mediante
xeolocalización, concibida para “ter sempre localizados os
efectivos humanos e as máquinas (carretillas, vehículos
industriais...) e así mellorar os tempos de resposta e aumentar a
rendibilidade”. Ante as novas prioridades que marcou a pandemia (a
urxencia de garantir o cumprimento da distancia social de seguridade
e o aforamento), a firma adaptou o seu sistema de xeoposicionamento
en interiores á nova situación, dando como resultado Situm COVID
19, unha tecnoloxía que resolve “boa parte da problemática á que
se enfronta o sector industrial na actualidade”.
Entre
as súas características salientan as seguintes:
·
Non necesita apenas infraestrutura adicada xa que aproveita as redes
Wi-Fi e Bluetooth xa existentes.
· O
sistema pódese implantar en apenas unha semana.
·
Só é necesario dotar aos traballadores dun smartphone.
·
Detecta e rastrexa por planta.
·
Recibe toda a información de maneira clara e intuitiva por medio de
mapas ou gráficas nunha única pantalla.
·
Todos os datos recollidos durante as distintas quendas rexístranse
en analíticas e estatísticas que permite un estudo pormenorizado a
posteriori.
Polo
que se refire ás súas aplicacións, estas son as principais:
·
Control de distancia de seguridade: a solución alertará ao
traballador se está en risco de incumprir a distancia mínima de
seguridade.
·
Control de aforamento: notificarase no caso de que haxa risco de
superar o número recomendábel de persoas nun espazo, como nas zonas
comúns. Para isto, emprégase a tecnoloxía geofence de
Situm, que permite delimitar e analizar o uso que se fai dun lugar en
concreto.
·
Rastrexabilidade de empregados: todos os usuarios deixan unha pegada
no sistema, de maneira que ante calquera contaxio pódese identificar
de maneira rápida e efectiva ao persoal que estivese en contacto cos
afectados.
·
Detección automática de calquera entrada ou saída das
instalacións: o que proporciona un sistema de control presencial
(fichaxe) sen necesidade de establecer contacto con ningunha
superficie.
·
Alarmas xeolocalizadas nos puntos de desinfección: ante a obriga de
que o persoal siga unhas pautas de hixiene estritas, o sistema pode
enviar avisos que lembre os protocolos que deben realizar ao pasar
por un determinado lugar.