AGACA e AgroSmartGlobal ofrecen un servizo de consultoría para internacionalización dixital
martes, 15 de xuño do 2021
O
proxecto europeo AgroSmartGlobal,
no que participa AGACA (Asociación Galega de Cooperativas
Agroalimentarias), ofrece un
servizo gratuíto e personalizado de consultoría para a
internacionalización dixital nos mercados de China e Estados Unidos.
Segundo
informa AGACA, está dispoñíbel para calquera pequena ou mediana
empresa agroalimentaria que o solicite, contactando con AGACA
(escribindo a Loli Couso ao loli@agaca.coop ou chamando ao 981 58 47
83), xunto co resto de servizos do proxecto devandito, entre os que
se atopan formación, inclusión de produtos en plataformas de venda
en liña e comunidade virtual.
O
obxectivo de AgroSmartGlobal é “o perfeccionamento da
internacionalización dixital nas cooperativas a través do
fortalecemento de alianzas empresariais con China e Estados Unidos e
mediante a intercooperación entre as entidades participantes”. En
base a isto, búscase documentar as posibilidades reais de éxito en
comercio electrónico, tanto nacional como internacional, para as
empresas analizadas e propoñer unha estratexia de execución
realista e adaptada a cada unha delas.
A
consultoría realízase en fases, comezando por un diagnóstico da
madureza dixital da empresa a través dunha ferramenta específica e
de vídeo-conferencias directas con cada entidade, tras o que se
procederá a unha análise de mercado e de competidores para, logo,
establecer recomendacións personalizadas e exemplos de servizos que
a empresa pode contratar para a execución da súa estratexia tanto
en B2B (de empresa a empresa) como en B2C (de empresa a consumidor).
A
maiores, foi publicada a Guía de factores clave para a
internacionalización dixital, de libre acceso na
páxina web do proxecto.