AGASOL achega aos autónomos galegos unha exhaustiva guía para non perderse no eido do software libre

Os traballadores, autónomos e empresarios galegos saben que hai un mundo de posibilidades de programación aberta para facilitar o seu labor profesional, pero se cadra era preciso que alguén ou algo llelo sintetizase, amosase e simplificase. Este de divulgar e presentar a potencialidade do código aberto é precisamente o obxectivo da Asociación Galega de Empresas de Software Libre (AGASOL), á hora de dar forma á Guía de Solucións TIC en Software Libre para profesionais autónomos, unha escolma de recursos á vez que unha folla de ruta profesional ao servizo dos nosos traballadores por conta propia e, tamén, das pequenas e medianas empresas e dos usuarios TIC en xeral. A guía, ao mesmo tempo un conxunto de materiais didácticos dispoñíbel de balde, foi presentada este mércores no Centro Demostrador TIC de Galicia (Conxo, Santiago) polo xerente de AGASOL, Luis Alberto Fernández.
A escolma foi posíbel grazas á colaboración desta plataforma coa Axencia para a Modernización Tecnolóxica de Galicia (AMTEGA) e a Federación de Autónomos de Galicia, FEAGA, cuxo presidente, Francisco Javier Pérez Bello, aproveitou a oportunidade para lembrar o traballo que cómpre facer no camiño de acurtar as distancias do colectivo que representa coas novas tecnoloxías da información, un camiño que sen dúbida será máis transitábel grazas ao recurso achegado por AGASOL, e máis se temos en conta que se trata dunha escolma de programas, servizos e ferramentas de software libre e, polo tanto, de custes máis asumíbeis, máis adaptábeis ás necesidades de cada quen e cun menor número de ataduras de dependencia privativas (licenzas e incompatibilidades e demais). Ou sexa, que estamos a falar de recursos especialmente acaídos para os nosos autónomos e pequenos empresarios.
O presidente de FEAGA, logo de amosar o seu convencemento na utilidade destes produtos abertos, animou aos profesionais galegos por conta propia a estaren en Internet. Esta arela, por certo, xa deu froitos como por exemplo o estudo recente presentado por AMTEGA e FEAGA no que se incidía na situación dos autónomos galegos con respecto ás TIC e cuxos resultados non fixeron máis que confirmar o que se intuía: que o nivel de afianzamento das novas tecnoloxías entre os traballadores por conta propia “é moi baixo, case ínfimo”, lembrou Pérez Bello. A pregunta de que se pode facer para mellorar esta situación, engadiu, sen dúbida remítenos á cuestión formativa e divulgativa, unha cuestión asumida en boa medida pola devandita Guía de Solucións TIC, unha folla de ruta que “vai facilitar o día do día dos nosos profesionais”, engadiu.
A continuación veu a quenda de Luis Alberto Fernández, ou sexa a presentación propiamente dita de AGASOL e máis da guía. Ao seu xuízo, “esíxense hoxe en día, máis que nunca, ferramentas rendíbeis e a custes asumíbeis, sinxelas e útiles, cousa que apunta claramente ao software libre e ao seu crecemento na nosa terra, un proceso que está a mudar para sempre a evolución das TIC en Galicia”. E engadiu: “Co software libre fuximos da dependencia dos grandes monopolios e das licenzas privativas, unha dependencia de uso e máis de investimento”. Polo que respecta á guía en si mesma, sinalou que se trata dun documento de consulta e información sobre novas tecnoloxías de utilidade para a xestión, a organización, a difusión e a venda en calquera negocio. Está orientada sobre todo ao eido dos autónomos, que terana á súa disposición de balde na web de AGASOL, na de Mancomún e na do Centro Demostrador TIC (onde mentres se desenvolvía a presentación, xa a puidemos ver habilitada). Asemade, é un documento exhaustivo de 147 páxinas nas que se tocan unha chea de puntos e áreas temáticas de interese: ferramentas TIC, xestión no móbil, mercadotecnia, redes sociais, comercio electrónico, presenza en Rede, eAdministración, utilidades de LibreOffice, etc. Entre as primeiras, as ferramentas TIC en xeral, a guía salienta recursos de uso común como o navegador Firefox, o xestor de correos Thunderbird, a ferramenta de tratamento de imaxes Gimp (unha boa alternativa a Photoshop), o recurso de procesos comunicativos Pidgin, o software SugarCRM para a xestión empresarial ou o fornecedor de informes Jasper Reports. Asemade, na guía saliéntanse as múltiples vantaxes do paquete ofimático LibreOffice, unha ferramenta que non ten nada que envexar a outras que hai no mercado, tanto en rapidez como en utilidade e compatibilidade.
A guía, fíxose saber, é o resultado dun proxecto de colaboración definido no marco do Plan de acción en Software Libre do ano 2013, entre o CDTIC, AGASOL e FEAGA. O obxectivo do proxecto consistía en achegar as TIC aos profesionais autónomos e ás PEME do país a través de ferramentas de software libre que lles axuden a mellorar as súas principais actividades diarias. “A colaboración con FEAGA foi fundamental para determinar cales eran as principais necesidades do sector obxectivo en Galicia, de maneira que AGASOL puidese centrar a guía no tipo de solucións máis axeitadas”, informa AMTEGA.