Adamo ofrece contratación de fibra óptica por días para o mercado das segundas residencias

A operadora Adamo quere ampliar a súa carteira de produtos e ofertas ao máximo para adaptarse o máis posíbel ás necesidades dos clientes durante o verán e outros períodos vacacionais. Con este obxectivo, a compañía fortaleceu a súa oferta para segundas residencias ofrecendo aos clientes contratación de fibra óptica por días.
De forma desagregada, a empresa expón as seguintes opcións baixo o paraugas de AdamoEliges (a denominación para esta nova modalidade) sempre en xornadas consecutivas e con fibra óptica de 400 Mbps:
· Tres días de servizo por 8 euros.
· Sete días por 15 euros.
· Quince días por 22 euros.
· Trinta e un días por 26 euros.
Segundo explica a operadora, “grazas a esta versatilidade e uns prezos en grao sumo competitivo, o usuario pode navegar por Internet de alta velocidade unha fin de semana, unha semana, medio mes, un enteiro... sen ter que pagar durante os períodos nos que non habita a súa segunda residencia”.
Este novo produto permite dispoñer de conexión ultrarrápida nela sempre que sexa necesario. Así só se paga cando se utiliza o servizo.
Este novo paquete de contratación por días complementa a oferta de segundas residencias que Adamo expón desde hai tres anos: 100 Mbps de velocidade por 15 euros ao mes, o que é, en palabras da empresa, “un dos prezos máis económicos do mercado neste segmento”.
Esta tarifa permite ao cliente conectarse sen límites todos os días de maio a outubro -a época de maior utilización das vivendas vacacionais- e as fins de semana de novembro a abril, cando as visitas a estes inmóbeis tamén resultan máis frecuentes. Adamo engade que non fai falta contar con liña telefónica fixa no domicilio de asueto para desfrutar do dito servizo, e que a instalación é de balde. Ademais, ambos os paquetes teñen unha cota de activación de 30 euros e a permanencia é de doce meses.