AidFork organiza unha xornada sobre identidade dixital e ciberseguridade
martes, 27 de xullo do 2021
O
centro AtlantTIC da Universidade de Vigo, a través da súa
iniciativa de análise forense (AidFork), organizou para este
mércores 28 de xullo un seminario en liña aberto ao público no que
afondar en diferentes temáticas relacionadas coa identidade dixital,
a privacidade e a seguridade da información.
Digital
Identity, Data Privacy & Authentication: A multifaceted overview
é o nome deste seminario web que, segundo informou a
Universidade de Vigo, reunirá “ás diferentes partes interesadas
da industria, do ámbito académico e do ámbito gobernamental que
desempeñan un papel clave na transformación dixital”.
Detrás
da organización deste seminario está o Grupo de Procesado de Sinal
en Comunicacións da Escola de Enxeñaría de Telecomunicación,
integrado en AtlantTIC, e responsábel tamén de AidFork. O obxectivo
deste evento é “amosar a necesidade de establecer colaboracións e
xerar diálogo arredor da importancia de confiar na tecnoloxía
multimedia”.
A
xornada contará cunha mesa redonda aberta, que dará comezo ás 18
horas, na que participarán tres expertos con ampla traxectoria no
ámbito da privacidade e da seguridade. Patricia Argerey Vilar,
directora da Axencia Galega de Innovación (GAIN) será a encargada
de introducir aos poñentes da mesa, que enfocarán os temas desde
diferentes perspectivas.
Fernando
Pérez-González, catedrático do Departamento de Teoría do Sinal da
Universidade de Vigo e líder do grupo GPSC de AtlantTIC, abordará
estas cuestións desde un punta de vista académico e de
transferencia de coñecemento e tecnoloxía.
Por
outra banda, Frederic Ly, responsábel no sur de Europa da empresa
norteamericana Jumio, especializada en autenticación e verificación
de identidade, ofrecerá a perspectiva de liderado na industria
dixital.
Leonardo
Cervera Navas, director da European Data Protection Supervisor
(EDPS), a autoridade de protección de datos da Unión Europea, será
outro dos convidados da mesa redonda. Cervera é responsábel de
asesorar sobre lexislación e política de protección de datos, así
como da coordinación e aplicación das estratexias e políticas da
institución, e encargarase de aportar un enfoque institucional.
A
xornada poderase seguir en streaming previo
rexistro en liña.