Aínda estamos a tempo de presentar propostas ao Premio ao Mellor Proxecto Fin de Carreira con Software Libre
luns, 1 de outubro do 2012
O prazo para a achega de propostas á quinta edición do Premio ao mellor proxecto de Fin de
Carreira con Software Libre, promovido pola Axencia de Modernización Tecnolóxica
de Galicia (AMTEGA), Igalia e Trasno, ficará aberto ata o vindeiro 31 de
outubro. Segundo informan as entidades promotoras deste recoñecemento, dirixido
a visualizar e distinguir o importante traballo de investigación en programación
aberta que se está a desenvolver no noso eido universitario, ao devandito
premio poden presentarse tódolos proxectos de fin de carreira que foran
presentados no Sistema Universitario Galego en calquera das convocatorias nos
anos académicos 2010-2011 e 2011-2012, incluídos polo tanto os de setembro de
2012.
Os requirimentos que deben cumprir os proxectos son os seguintes: ter sido desenvolvidos
cunha integración-aplicación libre de calquera linguaxe de programación e que
fora publicado o software desenvolvido durante o Proxecto Fin de Carreira cunha
licenza aberta entre as recoñecidas como tal pola Free Software Foundation ou a
Open Source Initiative.
O premio está dotado con ata 2.300 euros a repartir en tres categorías;
primeiro premio e accésit, concedidos pola empresa Igalia, e unha mención
especial, que concederá a Asociación Cultural Trasno á promoción da lingua
galega no ámbito novas tecnoloxías ao proxecto en software libre no que se
traduza, localice, internacionalice ou se difunda a lingua galega.
A firma galega Igalia tamén ofrece un 10% de desconto adicional aos
participantes neste premio que queiran cursar o Máster en Software Libre para o
tamén continúa aberto o prazo de matriculación. As persoas interesadas en
participar poden consultar as bases
na páxina do premio ao abeiro do portal mancomún, ou ben pórse en contacto
coa oficina de coordinación FLOSS da Xunta, en ocfloss@xunta.es.
Dáse a circunstancia de que este ano, a diferenza de outras convocatorias
que viñan da man –integramente- de Igalia, o certame conta coa Axencia para a
Modernización Tecnolóxica de Galicia en labores de organización, por vez
primeira. A iniciativa, sinala a Axencia, insírese na súa liña de actividade de
promoción do código aberto, “o Plan de Software
Libre 2012 da Xunta para mellorar e potenciar os mecanismos de formación e
difusión do software de fontes abertas entre a cidadanía galega”.
Este premio, que vai pola
súa V edición, foi creado no 2007 pola empresa galega Igalia, tras detectar un baleiro de profesionais especializados neste área. Xunto
co premio, Igalia puxo en marcha o Máster en Software Libre que organiza en colaboración coa Universidade ReyJuan
Carlos.
Ademais de co patrocinio
da empresa Igalia e da Asociación Cultural Proxecto Trasno, cóntase coa
participación e colaboración das tres universidades galegas, de AGASOL, e das
asociacións galegas de usuarios de Software Libre GALPon, Ghandalf, GPUL,
Melisa e Trasno.