Altia, R e Tecnópole participan no foro de emprego que comeza este martes en Vigo
luns, 21 de marzo do 2011
- Equipo coordinador do foro, formado por alumnos das tres escolas de enxeñaría do campus de Vigo
Esta semana a Universidade de Vigo acolle a
undécima edición do Foro Tecnolóxico
de Emprego, unha xuntanza que comeza este martes 22 ás 13.00 horas e
que como o seu propio nome indica diríxese a facilitar a procura dun posto de
traballo en empresas da innovación, e, tamén, a través de recursos innovadores.
En definitiva, que o
foro terá base tecnolóxica non só polo tipo de empresas ás que convoca, senón
tamén pola índole das actividades ás que vai dar acubillo (obradoiros, traballos
en rede, workshops, etc) e polos
formatos de comunicación demandante-empresa que proxecta visualizar. Segundo
fai saber a organización da xuntanza, este ano haberá importantes melloras, nos
recursos postos en xogo e na cantidade de firmas que participan.
O foro terá o seu emprazamento na ETSE Minas,
onde se dará acubillo a 18 postos de información e contacto, aos que se van
unir cinco empresas achegando relatorios sobre o mercado laboral da innovación.
As actividades rematan o xoves 24.
Entre as empresas e entidades novas atopamos a
Alcoa, Babel, EF, a Fundación Barrié de la Maza, Quantum, Imaxdi, Tecnópole
(Parque Tecnolóxico de Galicia) ou Bancaja, e entre as que reinciden albiscamos
algunha que outra de base tecnolóxico-dixital, como Accenture, Altia Egatel ou
R, a operadora galega de telecomunicacións que este ano, por certo ten
programado o desenvolvemento dun workshop,
un obradoiro activo aberto á participación de enxeñeiras e enxeñeiros. Amais
das devanditas, tamén participarán no foro empresas como Bosch, Cepsa ou
Repsol, ás que hai que engadir a Altrán, que ao igual que R prepara un encontro
activo-integrador.
Aínda que a inauguración terá lugar este
martes día 22, ás 13.00 horas, sinala o equipo que organiza o Foro Tecnolóxico
de Emprego, “dende a mañá do luns 21 ata
o xoves 24 o salón de graos da Escola de Enxeñaría de Telecomunicación, o salón
de actos da EE Industrial e o vestíbulo da ETSE de Minas acollerán as
diferentes actividades abertas a todo o alumnado interesado, sexan ou non da
Universidade de Vigo”.
Por certo que co obxectivo de que ninguén fique sen a súa oportunidade
de darse a coñecer perante as empresas participantes, a organización xa
anunciou que empregará a páxina do foro para facilitar os contactos.