Amazon presenta a súa alternativa ao Chromecast de Google

E abril Amazon presentou o seu Fire TV, un dispositivo que leva Android ao televisor como sistema para achegar contidos multimedia ao salón e que incluso pode empregarse como consola de videoxogos, concepto que pareceu agradar a Google, que anunciou hai pouco un produto semellante, o Nexus Player; e agora é Amazon quen parece responder a Google estreando o Fire TV Stick, que vén a ser o que poderiamos definir como o Chromecast de Amazon.
O Fire TV Stick é así un dispositivo que podemos conectar a un porto HDMI do televisor para amosar contidos da Internet dun xeito sinxelo e cómodo (apostando principalmente polas películas, series de televisión, cancións e xogos do catálogo de Amazon), e que busca imporse ao Chromecast ofrecendo un apartado técnico bastante superior: ten un procesador máis potente (de dobre núcleo) o dobre de memoria RAM (1 Gb) o cuádruplo de almacenamento interno (8 Gb), unha Wi-Fi máis rápida (de dobre banda e dobre antena) e incluso un mando a distancia. Véndese por un prezo de 39 dólares (4 dólares máis caro que o Chromecast) pero ofértase por 19 dóalres por tempo limitado.
Entrando en detalles, o Fire TV Stick funciona cun procesador Broadcom Capri 28155 con gráfica VideoCore4, 1 Gb de RAM, 8 Gb de almacenamento interno, Wi-Fi N con MIMO, Bluetooth 3.0, HDMI 1.4b (sobre o que amosar vídeo até 1.080p a 60 imaxes por segundo), micro USB (para recibir carga), unhas medidas de 84,9 x 25 x 11,5 milímetros e un peso de 25,1 gramos, mentres que o seu mando a distancia mide 119 x 40,4 x 13,8 milímetros e pesa 56,9 gramos (con 2 pilas AAA no seu interior). Aparte de empregarse mediante o mando a distancia incluído, tamén opera cunha aplicación de mando a distancia para smartphones que incluso soporta ordes de voz.
Un interesante produto que sairá oficialmente nos EE.UU. o 19 de novembro, e do que aínda non sabemos se chegará a España, xa que a oferta de contidos en liña de Amazon no noso territorio é bastante pobre, de xeito que este trebello perdería bastante atractivo (de feito, o Fire TV orixinal segue sen estar dispoñible aquí).