Amigus móstranos nun hackathon como converter a nosa casa nun fogar dixital

O vindeiro 2 de outubro a Asociación Amigus vai organizar unha nova e interesante xornada maker para seguir introducindo a pequenos e maiores nas posibilidades creativas das tecnoloxías libres, abertas e participativas. Trátase dun novo obradoiro dos Amigus Labs centrado desta volta na domótica e na Internet das Cousas (IoT), empregando software e hardware libre. A cita, que vén con formato de hackathon, conta co patrocinio da Xunta de Galicia.
Segundo informan dende Amigus, “son moitas as solucións e produtos actuais que buscan facernos a vida máis fácil na nosa casa conectando todo a Internet, dende as luces e a aspiradora até a lavadora, pasando pola neveira ou o cepillo de dentes, e neste obradoiro aprenderemos como unificar e habilitar todos os nosos dispositivos con home assistant, desde a instalación e configuración básica a integracións e configuracións máis complexas para facer que a nosa casa pense por nós”. A cita tamén dirixida a resolver as dúbidas que poidamos ter en materia de compatibilidade, “xa que no noso día a día corremos o risco de acabar con ducias de servizos e aplicacións de fabricantes diferentes”.
A duración do hackathon será de 10:30 a 19:00 horas. Temos toda a información reunida na web dos Amigus Labs, a través da cal é posíbel formalizar o rexistro. Para calquera dúbida, enviar un correo á conta amigus@amigus.org.
A persoa encargada de impartir os contidos será Javier Vila, enxeñeiro full-stack en Santander UK pero tamén maker no seu tempo libre.