Angry Birds 2 verá a luz nun par de semanas

xoves, 16 de xullo do 2015 Marcus Fernández

Nos últimos anos Rovio conseguiu acadar cotas de éxito totalmente imprevisibles coa súa franquía Angry Birds, facendo que un sinxelo xogo para móbiles protagonizado por uns paxaros anoxados conseguisen callar entre o público até o punto de facturar máis en mercadotecnia que polos propios xogos. Os Angry Birds e os seus antagonistas, os porcos verdes, foron saltando de plataforma en plataforma até chegar a protagonizar 52 xogos en tootal, acumulando uns tres mil millóns de descargas, e aínda que nas últimas entregas intentaron incorporar novidades que puidesen revitalizar a saga, finalmente consideran que pasou o momento dos spin-offs e optan por anunciar que o vindeiro 30 de xullo van lanzar “a nai de todas as secuelas”, Angry Birds 2.
Durante os vindeiro días irán dando máis detalles sobre o novo Angry Birds nas distintas plataformas sociais existentes, para animar o que promete ser un lanzamento que volva captar a atención dos seareiros destas criaturas que tantas horas de diversión achegaron a dispositivos móbiles (e incluso consolas tradicionais e ordenadores persoais).

PUBLICIDADE