Arbo culmina a posta a punto tecnolóxica do Centro de Interpretación da Lamprea
luns, 30 de decembro do 2019
O
Concello de Arbo quixo rematar ao ano facendo unha serie de melloras
tecnolóxicas no Centro de Interpretación da Lamprea e do Viño do
Condado Arabo. A optimización consistiu basicamente en actualizar os
contidos do espazo expositivo, cultural, turístico e dinamizador e,
tamén, o equipamento multimedia do centro. Os traballos, que se
poden
visualizar nunha peza audiovisual explicativa lanzada polo Concello
nas redes, foron posíbeis grazas a un investimento de case
66.000 euros, os cales, na súa meirande parte, procederon dunha
subvención do Fondo Europeo FEADER.
O
Centro de Interpretación do viño e da Lamprea Arabo é, en
palabras, da Administración local, “unha fiestra cara aos
visitantes para descubrir o que o Concello de Arbo pode ofrecer,
ademais de transmitir a través dos paneis e os vídeos a verdadeira
realidade e a historia do municipio”. Tendo en conta a súa
relevancia e a necesidade de actualizar a súa capacidade para atraer
visitantes e mellorar a súa experiencia, púxose en marcha un
proxecto para “mellorar o deseño e a exposición permanente”
achegando novos contidos (catro
audiovisuais lanzados tamén nas redes e que se poden ver tamén na
web do Concello de Arbo) e equipando a infraestrutura con
sistemas multimedia para o visionario dos vídeos e do material
interactivo: pantallas táctiles, monitores e proxectores con novos
vídeos, fotografías, grafismos, contidos interactivos e redacción
de novos textos.
Coas
melloras introducidas no Museo Arbo, creouse un espazo para albergar
unha exposición permanente sobre a Festa da Lamprea (histórica
festividade cuxa primeira edición remóntase ao día 16 de abril de
1961, organizada por un grupo de veciños, funcionarios e
restauradores do Concello a cargo da Comisión Pro Homenaxe á
Lamprea, que tributaba a través desta xornada festiva o
recoñecemento a unha riqueza antiga e inmemorial que o Miño
proporcionaba).