As claves da neurociencia para facer os mellores equipos, ao detalle da man de Vitae
mércores, 19 de setembro do 2018
Os
profesionais que queiran mellorar as súas capacidades á hora de
facer equipo de traballo e garantir o éxito dos seus proxectos
(porque o equipo humano, a fin de contas, é a clave dunha boa
iniciativa innovadora), van ter este outono unha inmellorábel
oportunidade para ampliar recursos, coñecementos e horizontes. O
obxectivo último: sermos mellores profesionais de recursos humanos
ao saber con exactitude que talentos precisamos e como conseguir que
estes abrollen e dean o mellor de si. Todo isto vén a conto porque
Vitae Consultores organiza este mes de outubro (os días 22, 23, 29 e
30) a edición número 11 do Curso
Avaliación e Selección Avanzada de Perfís TI (e non TI) baseadas
na Neurociencia. Será un obradoiro de 20 horas a desenvolver na
Coruña, no Hotel Attica 21.
O
curso, tendo en conta as claves que subministra sobre os moitos e
variados talentos dos nosos profesionais potencialmente candidatos
para as empresas innovadoras e os seus equipos, diríxese sobre todo
a directores de proxectos e responsábeis de recursos humanos.
En
materia de certificación, acreditacións e currículos, o obradoiro
proporcionará aos asistentes 18 PDU, que son as Unidades de
Desenvolvemento Profesional (polas súas siglas en inglés
Professional Development Unit) a validar polo PMI (Project
Management Institute).
A
actividade formativa de Vitae ten ademais o obxectivo de afrontar,
con recursos concretos, un dos grandes desafíos do devandito ámbito
profesional: como dotar aos axentes de recursos humanos coas
ferramentas psicolóxicas básicas para estimar que tipo de talentos
ten un profesional a valorar? Por desgraza, segundo sinala Vitae, o
común das metodoloxías máis estendidas non capacita neste punto,
“o que implica que toda metodoloxía falle”, pois fallou
previamente o alicerce da mesma, é dicir, “quen avalía non foi
formado nin capacitado para esta tarefa”. En base a este punto,
explica Vitae, o primeiro paso para calibrar a outro profesional será
aprender a calibrarnos a nós mesmos. “Coñecéndonos deste xeito
acadaremos meirande obxectividade na avaliación doutras persoas”,
sinalan dende a consultora, engadindo que neste curso
subministraranse as ferramentas e recursos máis indicados para
lograr o autocoñecemento e para o exame doutros profesionais, sexa
cal sexa o modelo de avaliación do desempeño do que se bote
finalmente man.
Para
Vitae, é unha realidade incontestábel que o sector das novas
tecnoloxías da información (o sector TI) demanda cada vez máis
profesionais dos dispoñíbeis no mercado laboral, o que xera
tensións nas empresas en canto a dar cumprido cos compromisos
profesionais en calidade e prazo cos clientes de seu e en controlar
os custes salariais e a equidade interna dos mesmos.
O
curso que presenta Vitae céntrase “na eficacia, en que facer, máis
que na eficiencia, en como facer, para seleccionar candidatas/os e
avaliar o desempeño dos nosos profesionais en contornas de escaseza
de traballadores, aínda que ambas as facetas, a eficacia e a
eficiencia, son necesarias para o éxito nos procesos de selección e
avaliación”.
Nesta
actividade formativa proporcionarase un método e unhas ferramentas
coas “que se conseguiu unha porcentaxe de éxito de máis do 90% en
selección de perfís TI, incluíndo perfís técnicos, perfís de
xefes de proxectos, perfís de desenvolvemento de negocio e perfís
de alta dirección”, informan os organizadores do obradoiro.
O
curso virá da man de Marcos Carbonell, profesional con máis de tres
décadas de experiencia nos sectores do deporte, as novas tecnoloxías
e os recursos humanos. Carbonell é diplomado en Empresariais,
mestrado en Recursos Humanos e posgrao en Marketing e en Organización
de Empresas. Dende 2006 é socio director de Vitae Consultores e
tense responsabilizado, directa ou indirectamente, de máis de 1.000
procesos de selección cunha taxa de máis dun 90% de éxito.