Colle corpo o Congreso de Software Libre de Igaciencia
mércores, 22 de xuño do 2016
Xa
está á volta do camiño, co programa ateigado de interesantes
charlas e obradoiros, a quinta edición do Congreso
de Software Libre e Foro Libre para a Educación, un evento de
Igaciencia que bota luz sobre as moitas posibilidades que se abren
coa interacción entre o ensino e a informática aberta e que este
ano terá dous piares fundamentais: a arela de compartir a máxima
cantidade de experiencias e a de amosar, para estender o seu
espírito, o miolo das máis salientábeis aventuras
educativo-tecnolóxicas da nosa terra. Celebrarase os días 30 de
xuño e 1 de xullo no Centro de Novas Tecnoloxías de Galicia, en
Santiago. Organiza a Institución Galega de Ciencia (Igaciencia) e
colaboran a axencia AMTEGA e o propio CNTG.
Nun
plano máis concreto e meténdonos de cheo no programa do evento,
este contará coa presenza de Margarita Saborido, campioa mundial do
concurso Mobile3D
da USC, que fará un percorrido polos seus traballos abeiro deste
certame (reconstruíndo unha figura en 3D a partir de diversas
fotografías); ou de Beatriz Padín, que falará sobre como facer un
estudo experimental de magnitudes físicas mediante análise de vídeo
con Tracker (cousa que lle valeu un recoñecemento europeo).
Tamén
intervirán Paz Freire, a gañadora do certame Inventa
en Galego do ano pasado, e máis unha
equipa integrada por Diego Nieto Caride, María José Malmierca
(investigadora do CESGA) e Juan Gordillo (do CPI Multilingüe O Cruce
de Cerceda), que explicarán os múltiples detalles da
plicación
e creación de materiais de Realidade Aumentada para Ciencias, un
dos proxectos europeos que desenvolven no Centro de Supercomputación
de Galicia (CESGA).
Igualmente,
o congreso contará coa presenza de
Mario Riotorto (programador de Maxima), que fará un percorrido pola
súa experiencia coa linguaxe Javascript como linguaxe de
programación (neste caso para mundos 3D) ou coa de Xacobo de Toro
Cacharrón, que debullará os traballos de vídeo que realiza e cos
que rematou a súa tese o ano pasado. Horacio Gómez, pola súa
banda, falará da estreita relación da creación da música
electrónica e o Arduino ou o Raspberry.
Segundo
nos contan dende a organización, outro dos paires do Congreso será
o concepto de Internet das Cousas, que é como se define a revolución
tecnolóxica dos obxectos conectados (máquinas interactuando entre
elas e con nós) ao servizo de eidos como os coidados médicos, as
actividades deportivas, a xestión das vilas e cidades, o fogar
dixital ou a rendibilidade empresarial.
Segundo
nos avanzan dende Igaciencia, a realidade dos obxectivos conectados
(polas súas siglas en inglés IoT) está aí para quen queira vela e
mergullarse nela, xa que “non vén das grandes corporacións nin
das grandes cidades, senón dos usuarios e desenvolvedores de a pé”,
os seareiros e, tamén, os integrantes dunha comunidade que non para
de medrar: a comunidade Raspberry Pi. Trátase dunha tecnoloxía de
baixo custe, lixeira e accesíbel para todas e todos os membros do
ámbito escolar. Segundo lembran dende Igaciencia, o Raspberry Pi é
“o amo do Internet das cousas”. Insistir nesta mensaxe e botar
aínda máis luz sobre as posibilidades na educación (cousa que xa
se avanzou firmemente en anteriores edicións) será un dos leit
motiv básicos desta convocatoria 2016
do Congreso de Software Libre.