Críticas a Vueling Móvil pola desinformación aos seus clientes tras o seu peche

Sexa pola crise, sexa porque se trata dun proceso natural, o caso é que estes días estamos a ser testemuñas do peche dun número salientable de empresas, moitas delas da peor maneira posible, deixando importantes eivas sociais entre os seus traballadores e denegándolles aos seus clientes a continuidade duns servizos que lles correspondían. O caso de Vueling Móvil probablemente non sexa tan grave como o de Air Comet (a firma de voos de baixo custe que deixou na estacada estes días a centos de viaxeiros), pero tamén ten o seu. Segundo se conta na Rede, os problemas de Vueling xa comezaron coa súa división principal (servizos propios dunha aeroliña) e agora están a estenderse ás restantes das súas achegas, entre as que se contan as solucións de telefonía de Vueling Móvil. Ao parecer, as maneiras non son precisamente as mellores, posto que a compañía fíxolles saber aos seus clientes que só teñen un mes para carrexar o seu número ao outra firma, habendo a posibilidade de perdelo no caso de non facelo así.
A isto cómpre engadir o feito de que Vueling pechou a web centrada nos seus servizos de telefonía móbil e unha boa parte dos seus clientes non saben a que porta chamar para que se lles aclare a cuestión, punto por punto, tal e como merecen. Así, se accedemos á web vuelingmovil.com seremos redirixidos á páxina principal da compañía.
O que si que poderemos facer é comunicármonos co servizo de atención ao cliente no 2226, onde polo de agora se está a ofrecer asesoramento.