EGANET comeza a segunda fase do proxecto para selar alianzas no sector do software
luns, 18 de xullo do 2011
- A directora xeral de BIC Galicia, Maite Cancelo, e o presidente de EGANET, Víctor López
A cooperación, algo que vale dende hai séculos
para obter o máximo rendemento do noso traballo, tamén é un dos piares básicos
da actividade tecnolóxico-dixital. No caso galego, onde non predominan as
grandes empresas senón as de mediano e pequeno tamaño, a estratexia do traballo
en común aínda colle máis corpo. Isto sábeno dende EGANET, onde se
está a abordar a segunda fase dun proxecto que convida e asesora ás nosas
empresas no proceso de fusión e establecemento de cooperacións e alianzas
empresariais.
Cómpre non buscar o obxectivo desta iniciativa
nas máis modernas e avanzadas estratexias de acción empresarial. A cousa, como
dixemos, vén de antigo: máis mans para un mellor e máis eficaz resultado. A
iniciativa, que se dirixe a entidades galegas de software e de contidos
dixitais, xeralmente de reducidas dimensións, está neste intre no seu ecuador. A
recta final será en setembro, cando entre en funcionamento a terceira e última
fase do proxecto, encamiñada á consecución do afianzamento das alianzas co
apoio e colaboración de profesionais cualificados e sen custos para os
participantes.
Segundo informa EGANET, a semana pasada deuse
comezo á segunda fase da estratexia, chamada A Cooperación Empresarial: As Alianzas Estratéxicas. Detrás desta
iniciativa atópase, como dixemos, EGANET, que conta co apoio da Consellería de
Economía a través de BIC Galicia. A xornada de apertura da segunda fase comezo
con resultados produtivos, sinala a asociación. Ao abeiro deste encontro,
celebrado nas instalacións de BIC Galicia en San Lázaro, realizouse unha “autodiagnose de cada unha das empresas
participantes, co seu análise da organización e avaliación financeira, e con
resultado de informe do valor de cada unha”. De xeito complementario, déronse
os primeiros pasos para establecer as compañías afíns coas que poder establecer
posibles alianzas.
Como se dixo, o obxectivo deste novo proxecto
é loitar contra a atomización do sector TIC galego e conseguir, mediante da
cooperación e as alianzas, que as empresas gañen volume, diversifiquen tanto
mercados como produtos/servizos e melloren a estrutura de capital.