En marcha unha iniciativa para levar futbolíns solidarios, en liña, ás universidades españolas
martes, 18 de setembro do 2012
Os
días pasados presentouse en España unha iniciativa con especial potencial para
cinguir o mundo físico co virtual, a actividade deportiva clásica e a que se
fai en liña. Asemade, trátase dunha proposta que lle toca de preto a un invento netamente
galego: o futbolín. A cita foi no
HUB Madrid, onde se deu a coñecer o proxecto Futboling, achegado baixo o
lema Pásao ben mellorando o mundo e
coa arela de fornecer unha actividade de lecer co gallo de pór en xogo
solidariedade, e viceversa. Trátase, máis polo miúdo, dunha máquina fabricada
en polietileno, con feitura de futbolín clásico (cambian os materiais, iso si),
pero cen por cen reciclábel, sostible en si mesma e co engadido de estar
enchufada a Internet e canalizando axudas monetarias a entidades humanitarias e
sociais. Hai polo tanto un terceiro elemento a sumar: o elemento solidario.
Futboling,
cuxa patente é cen por cen española, permite “crear unha experiencia de diversión 2.0”, informan os seus responsábeis,
“xa que grazas á súa conexión a Internet
pódese realizar unha competición global, en tempo real, en calquera recanto do
mundo e mediante o seguimento dos resultados propios e alleos, a través dun
computador (vía a web de seu, futboling.com)
ou smartphone (vía iPhone e, en breve, Android)”. Estamos pois ante unha
iniciativa que mantén o cerne do xogo tradicional, apostando polo lecer
puramente físico arredor dun aparello de xogo, pero engadindo “dimensión social e universal”.
Respecto á súa vertente solidaria, dicir que por
cada moeda que se insire para xogar destínase unha parte ao traballo dunha
organización sen arela de lucro a elixir polos propios xogadores: Intermón
Oxfam, Fundación Josep Carreras contra a leucemia, Cáritas, Nenez Solidaria,
Mans Unidas, Fundación Vicente Ferrer, Medicus Mundi, Vencer ao Cancro e Adena
WWF España. A elas destinarase un tezo do importe da partida. Outro terzo á
Fundación Fun for a better world, a
entidade responsábel de Futboling, precisamente, co obxectivo de impulsar o
traballo a prol da inserción laboral das persoas con diversidades funcionais ou
motrices e conseguir que sexan elas mesmas as que desenvolvan tarefas de
asistencia técnica e mantemento das máquinas do proxecto. Un último terzo irá
dirixido ás universidades españolas nas que se van instalar os aparellos (60
polo de agora), sufragando por unha parte o aluguer dos espazos e destinando o
resto a bolsas, bibliotecas ou compra de material didáctico. Futboling, máis
polo miúdo, é un desenvolvemento que vén da man de Nacho Escobar e Félix
Lozano, aos que se van sumando, paseniño pero sen pausa, outros compañeiros que
comparten a idea orixinal do proxecto. En YouTube podemos ver un vídeo
sobre o funcionamento destes aparellos.