En marcha unha nova edición do espazo de coworking de Barro
luns, 7 de xaneiro do 2019
A
Deputación
de Pontevedra e a Escola de Organización Industrial veñen de
impulsar un nova edición, a terceira, do Coworking de Barro, un
espazo para o traballo innovador e colaborativo do que abrollan, cada
ano, importantes proxectos tecnolóxicos e/ou liderados por mulleres
(máis da metade das iniciativas). A nova convocatoria foi dada a
coñecer pola presidenta da entidade provincial, Carmela Silva, que
lembrou que o Coworking de Barro serviu entre outras cousas para
alentar a posta en marcha (xa) de 35 iniciativas novas de mercado. A
nova edición comezará o 5 de febreiro e rematará a finais de xuño.
Tal
e como sinalou Carmela Silva, “trátase dun proxecto dirixido ás
emprendedoras e emprendedores que teñan un proxecto en fase temperá
de desenvolvemento ou cunha empresa creada recentemente”. Tamén
lembrou que a través desta iniciativa, que conta cun orzamento de
800.000 euros, a Deputación de Pontevedra pretende “fomentar o
emprendemento e aumentar as posibilidades de éxito dos proxectos de
negocio que participen destes espazos de traballo colaborativo, nun
período de cinco meses”.
Silva
engadiu que as persoas que participen nesta nova edición terán
acceso a 100 horas de formación, concretamente 45 horas de
obradoiros formativos, 15 horas de dinámicas grupais, 20 horas de
titorías individualizadas coa persoa mentora do proxecto, 10 horas
de asesoramento expertio e 10 horas de soporte e seguimento. O
programa rematará cunha xornada de demostración, un DemoDay, no que
as e os participantes presentarán individualmente os seus proxectos.
As
emprendedoras e emprendedores tamén poderán acceder a outros
servizos de emprendemento promovidos pola Deputación. De feito, en
Barro poderán facer uso, de maneira gratuíta, do FabLab ou
Laboratorio de Fabricación Dixital, onde se dispón dun completo
equipamento de fabricación dixital (impresoras 3D, escáneres 3D,
kits de Arduino, fresadora de madeira, soldadores de electrónica,
material electrónico diverso, utillaxe, etc.) e no que se leva a
cabo, regularmente, un completo programa de accións formativas
específicas para familiarizar ás/aos profesionais con estas
tecnoloxías.