Epic Games ofrece de balde o xogo The Callisto Protocol

Un dos xogos máis destacados de 2022 foi The Callisto Protocol, por estar considerado unha continuación espiritual da serie de xogos Dead Space (xa que estaba dirixido por Glen Schofield).
Pero este título de acción e supervivencia non estivo á altura do que se esperaba, e aínda que mantén o mesmo tipo de interface que Dead Space para indicar a saúde do xogador e pode considerarse un dos xogos máis arrepiantes dos últimos anos, problemas no seu desenvolvemento levaron a que quedase lonxe dos seus obxectivos de vendas, o que sen dúbida foi chave para que agora The Callisto Protocol sexa un dos xogos que a tenda de Epic Games para PC ofrece de balde até o vindeiro día 29.
The Callisto Protocol convídanos a viaxar a dentro de 300 anos, a unha prisión de máxima seguridade situada na lúa de Xúpiter, Calisto, na que os presos comezan a transformarse en criaturas monstruosas, levando a que teñamos que combinar combates corpo a corpo e a distancia para poder saír con vida.