Estudantes da UVigo gañan o segundo premio do Reto SofIA para o Fogar de Telefónica

xoves, 2 de decembro do 2021 S. P.

Javier Abia, integrante do equipo Fundación (segundo pola dereita) xunto a Susana Jurado e Pablo López Coya de Telefónica

O equipo Fundación, integrado por estudantes da Universidade de Vigo, logrou co seu proxecto de ferramenta tecnolóxica Tomando o control do consumo do fogar o segundo premio do I Reto SofIA para o Fogar, impulsado por Telefónica desde o seu programa de bolsas Talentum, Rede de Cátedras e o Open Innovation Campus.
A solución do equipo da UVigo, integrado por Martina Páramos, alumna da Escola de Enxeñaría de Telecomunicacións da Universidade de Vigo, Javier Abia, estudante de Física na Universidade de Santiago de Compostela, e Juan Alberto Abia, graduado da Escola de Enxeñaría Industrial de Vigo, propón un sistema dirixido a reducir o consumo eléctrico dos fogares, ofrecendo, a partir da lectura do sinal da corrente do contador da vivenda, información ao usuario sobre o consumo e o comportamento dos diferentes electrodomésticos ou luces da mesma.
Durante a súa participación e para presentar as propostas de transformación e innovación, os alumnos contaron con recursos, clases maxistrais e asesoramento de diferentes equipos multidisciplinares de expertos da compañía.
As ideas gañadoras, dotadas cun premio de 3.000 euros no caso do primeiro clasificado, Sonidos del Hogar, do equipo Indiana, composto por Andrés Ortiz (Universidade Pontificia de Comillas de Madrid) e Luis Ibañez (Universidade Carlos III de Madrid), e de 1.500 euros, no caso de segundo premiado, foron seleccionadas tras a avaliación realizada por un comité de expertos de Telefónica, que valorou aspectos como a relevancia da idea presentada, o modelo e innovación baseado en Intelixencia Artificial ou o perfil dos integrantes de cada equipo. Tamén a presentación da solución proposta durante a DemoDay celebrada en Distrito Telefónica o pasado 23 de novembro.
Estas iniciativas e retos de innovación aberta forman parte de Open Innovation Campus, o lugar de encontro entre Telefónica e mundo académico.

PUBLICIDADE