Everis contratará 30 profesionais do ámbito tecnolóxico na Coruña
luns, 17 de outubro do 2016
Everis, consultora
tecnolóxica multinacional, vén de anunciar a contratación de 30
profesionais na Coruña ao longo dos vindeiros doce meses. Segundo
engadiu a compañía de orixe española nun comunicado, a meirande
parte das contratacións (o 80%) serán de mozas e mozos recentemente
licenciados en Tecnoloxías da Información e a Comunicación (TIC).
A porcentaxe restante corresponderá a profesionais “con
experiencia especializadas/os en tecnoloxías máis innovadoras”. A
día de hoxe, Everis acubilla nas súas instalacións da Coruña unha
equipa de máis de dous centenares de consultores.
Máis polo miúdo, a
consultora tecnolóxica seleccionará para a súa ampliación de
persoal mozas e mozos acabadas/os de titular en Informática,
Telecomunicacións, Industriais, Matemáticas, Físicas,
Administración e Dirección de Empresas, así como outras
enxeñarías.
Como dixemos, Everis
tamén anunciou a contratación de profesionais específicos sobre
tecnoloxías avanzadas de xestión e desenvolvemento, máis en
detalle titulados en ciclos formativos de grao superior en
desenvolvemento de aplicacións multiplataforma, desenvolvemento de
aplicacións web, administración de sistemas informáticos en rede e
sistemas de telecomunicación e informática.
En canto a profesionais
con experiencia, a firma quere contratar a profesionais
especializados en ámbitos como información masiva (Big Data),
computación na nube, mobilidade, Internet das Cousas (IoT) ou
“talento dixital en xeral”.
A ampliación de equipo
de traballo en Galicia non é un feito illado. De
feito, forma parte dun espallamento que atinxe a todo o territorio
estatal, un ámbito no que Everis quere incorporar un total de 2.500
profesionais, complementando este proceso coa posta en marcha dun
programa de 600 bolsas para estudantes “co obxectivo de
incorporalos á compañía tras a realización do período de
prácticas”. Na Coruña a previsión é que polo menos 10 persoas
se unan á consultora a través do programa de bolsas.
“Estas previsións de
contratación”, explica Everis sobre a orixe do proceso, “responden
aos bos resultados da empresa en España, que é o terceiro mercado
europeo onde máis medrou e o principal para a multinacional”. Máis
en detalle, o seu crecemento en España durante o pasado exercicio
fiscal foi do 19,3%, acadando os 474 millóns de euros, e a previsión
de Everis é a de manter esa tendencia á suba durante o vindeiro
ano.