ExpOtaku volve á cidade da Coruña

xoves, 23 de maio do 2024 Marcus Fernández

As instalacións de EXPOCoruña acollerán esta fin de semana unha nova edición de ExpOtaku, evento no que se mesturan as culturas do anime, do cosplay e dos videoxogos, para que os afeccionados poidan gozar entre o venres e o domingo dunha chea de actividades, vivir experiencias con outras persoas coas que comparten intereses, e descubrir tamén expresións artísticas, disciplinas artesanais e incluso aplicacións da tecnoloxía a estes ámbitos.
O evento permite a compra anticipada de billetes a través da Internet (aínda que as entradas anticipadas para o sábado xa están esgotadas), aínda que tamén será posible acudir ao despacho de billetes do recinto feiral durante a celebración do evento (cun prezo superior ao das entradas anticipadas).
Aínda que non serán poucos os que se acheguen a ExpOtaku para ver en persoa a varios dos actores de dobraxe de As Bólas Máxicas (como Gonzalo Faílde e Julio Lorenzo), nos 5.500 metros cadrados reservados no evento ao que acoden preto de 150 expositores repartiranse unhas 260 actividades que se adaptarán aos variados intereses dos afeccionados á cultura nipoa (e afíns).
Cómpre salientar a presenza de CESUGA nunha zona de deseño e desenvolvemento de videoxogos; un espazo organizado pola comunidade Ociorum que permite gozar libremente de videoxogos retro de consolas como a Nintendo 64, a PS2, a Dreamcast ou a Super Nintendo; estarán presentes unha boa mostra de desenvolvedores de videoxogos independentes; por parte de Project Droid teremos actividades relativas ao mundo da robótica; dende XPPEn tamén realizarán demostracións e obradoiros sobre o uso das súas populares tabletas gráficas (contando incluso coa presenza do ilustrador Juanjo López); e tampouco faltarán as zonas de xogos libre a consolas actuais e os torneos de videoxogos.

Sen nova edición da Hobbycon

Aínda que habitualmente a celebración de ExpOtaku marcaba o inicio da axenda friki coruñesa para o verán, desta volta a situación é un tanto diferente, xa que estes días dende a organización da Hobbycon, cita que tería que celebrarse a mediados de xullo no recinto de PALEXCO, está a dar conta da cancelación do evento de lecer alternativo que o ano pasado celebraba o seu décimo aniversario.
Dende a Hobbycon aseguran que o ano pasado pecharon un acordo verbal da Deputación da Coruña para colaborar co evento, o que levou a elevar o investimento económico realizado, sobrecusto que non foi compensado de ningún xeito polo ente público, levando á que a celebración dunha nova edición de verán fose inviable.
A cancelación da Hobbycon por falta de respaldo público é algo que sorprende, pois dende a Deputación aseguraban apoiar o evento na prensa e en redes sociais, o que non se correspondería coa realidade, provocando a desaparición dunha actividade que conseguira manterse sen axudas públicas durante a súa primeira década.
Deste xeito, PALEXCO desaparece da axenda de eventos deste tipo, quedando coa exclusiva dos mesmos o recinto de EXPOCoruña, onde se celebra a EXPOtaku (esta semana) e a Japan Weekend (previsiblemente no mes de outubro).

PUBLICIDADE