FACUA denuncia a Movistar polo seu novo servizo de chamadas perdidas
mércores, 13 de abril do 2011
Dun tempo para aquí, os usuarios de
telefonía que chamamos a clientes de Movistar que polo que sexa comunican, non
contestan, están fora de cobertura ou teñen o móbil apagado, recibimos a
resposta dun señor moi amable que nos convida xenerosamente a deixar unha
mensaxe de voz que o sistema transformará en mensaxe de texto para evitar que o
teñamos que escribir nos. Deste xeito, o que quedaría rexistrado como unha
simple chamada perdida, convírtese nunha boa parte dos casos en ingresos para
Movistar por envío de SMS.
Este servizo, do que falamos
recentemente en Código Cero por causar un claro malestar entre os usuarios de
telefonía (ao terse activado sen solicitude expresa dos seus usuarios), vén
de provocar que Consumidores en Acción denuncie a Movistar perante as
autoridades de Consumo, por “dar de alta
sen autorización un novo servizo de buzón de mensaxes aos clientes de móbil que
non teñen activado o buzón de voz”.
Movistar activoulle aos clientes
sen buzón de voz este servizo con claro afán recadatorio polo que FACUA válese
do artigo 89.4 do Real Decreto Lexislativo 1/2007, de 16 de novembro (polo que
se aproba o texto refundido da Ley General para la Defensa de los
Consumidores y Usuarios e outras leis complementarias) para denunciar a
Movistar por unha práctica abusiva: “a
imposición ao consumidor e usuario de bens e servizos complementarios ou
accesorios non solicitados”.
Esta denuncia chega logo de que a
compañía non contestara á reclamación de FACUA que lle demandaba “que dera de baixa este servizo non
solicitado de maneira que sexan os usuarios os que decidan se queren ou non
activalo”.
Agora a Asociación pediulle a
distintas administracións competentes “que
tomen medidas contra Movistar por estas irregularidades”.
Entre outros organismos, FACUA
remitiulle as súas denuncias á Dirección Xeral de Consumo da Comunidade de
Madrid, onde Movistar ten a súa sede social e ao Instituto Nacional de Consumo
(INC).
Para desactivar este servizo de chamadas
perdidas hai que chamar ao número 22217 e seleccionar a opción 2.