Facebook desactivará o seu sistema de recoñecemento facial

A preocupación do público pola privacidade provocou un grande rexeitamento cara a tecnoloxía de recoñecemento facial, e ante tal escenario dende Meta anuncian que vai pechar o sistema de recoñecemento de caras de Facebook, de xeito que borrarán o modelo que empregan para identificar cada cara dos seus sistemas, polo que ao subir unha fotografía ou un vídeo xa non se identificará de xeito automático ás persoas que aparecen.
Máis da terceira parte dos usuarios de Facebook aceptaran o uso do recoñecemento facial, pero o rexeitamento social leva a que agora vaian eliminar a información facial de máis dun milleiro de millón de persoas, medida que tamén ten lados bastante negativos, xa que o recoñecemento de persoas en imaxes aporta un grande valor, e permite cousas como que as persoas con problemas de visión poidan recoñecer aos seus amigos en fotografías.
Pero Meta non dirá totalmente adeus a esta tecnoloxía, que consideran que pode resultar moi práctica para, por exemplo, verificar identidades ou previr fraudes, polo que continuarán a traballar nestas tecnoloxías, aínda que non do mesmo xeito que estaban a facer até o momento, e poderían explorar métodos como que o recoñecemento facial teña lugar nos dispositivos dos usuarios e non en servidores externos (como xa fan moitos móbiles para o seu desbloqueo), polo que é aínda moi cedo para despedirnos do recoñecemento facial, e simplemente estamos ante unha operación destinada a evitar problemas legais e de imaxe por parte de Meta.