Facebook permite crear eventos de pagamento

venres, 14 de agosto do 2020 Marcus Fernández

Poder organizar clases de fitness de pagamento é unha das moitas opcións que permite agora Facebook

Dende Google están a estrear unha nova funcionalidade para axudar a profesionais e pequenos negocios a recuperarse na complicada conxuntura económica actual, de xeito que agora as empresas, os educadores, os creadores e os editores de contidos poden facer cartos cobrando por eventos na súa páxina de Facebook.
O distanciamento social fixo que se disparasen as retransmisións de vídeo a través de Facebook, e para aproveitar esta situación por parte dos negocios Facebook permite agora crear eventos de Facebook Live para os que é preciso aboarse, contando tamén coa opción de usar salas de Messenger para un nivel de interacción máis persoal.
Durante as probas realizadas en Facebook puideron ver como os expertos decidiron utilizar esta prestación para relatorios, gravacións de podcasts, clases de cociña, encontros con seareiros, clases de fitness e outras actividades, o que pode chegar a converterse nunha interesante fonte de financiamento.
Para gozar desta funcionalidade temos que recorrer á sección para configurar os eventos de pagamento en Facebook, onde nos indican se a nosa páxina está habilitada para tal fin, e podemos configurar unha conta bancaria para recibir os pagamentos dos usuarios dos que descontaranse unicamente os gastos de transacción (xa que dende Facebook entenden que este tipo de actividade é de pequena escala e buscan axudar á xente que está nunha situación complicada por mor da pandemia). Aínda que a intención de Facebook é que o pagamento das actividades vaia integramente aos organizadores, isto só acontece se os usuarios empregan Facebook Pay, ou sexa, que se as achegas económicas chegan a través da plataforma de pagamentos da App Store dende Apple quedan cunha comisión do 30% rexeitando a compañía de Cupertino facer unha excepción para axudar ás empresas que os están a pasar mal por mor da COVID-19.
Un detalle sobre o que dende Facebook insisten é en que nos eventos de pagamento só pode empregarse música da que se teñan os dereitos de explotación, polo que para a meirande parte de usuarios o máis recomendable sería empregar sons da colección de Facebook e música de dominio público para evitar problemas.
Será interesante ver se as pequenas empresas e os creadores de contidos comezan a utilizar esta plataforma como un xeito de realizar eventos en liña de pagamento sen ter que contar con complexas infraestruturas, pero resulta evidente que estamos ante unha opción moi interesante nestes momentos de distanciamento social.

PUBLICIDADE