Fortnite vístese de Star Wars

Finalmente Fortnite acolleu un evento de Star Wars: El Ascenso de Skywalker, demostrando a forza deste xogo como ferramenta promocional grazas á súa grande base de xogadores, á vez que se realimenta deste tipo de iniciativas, xa que os usuarios agradecen poder gozar de contidos temáticos, que desta volta tradúcese en blasters, espadas de luz, naves e aparencias de personaxes como Finn e Rey.
No mencionado evento puidemos ver como o director da película, J. J. Abrams, facía acto de presenza tras un combate entre o Falcón Milenario e uns TIE Fighters para presentar unha secuencia inédita da película que este xoves chega aos cines, e permitir que os xogadores votasen logo pola súa espada de luz favorita, para iniciar logo un duelo de espadas xigante.
Aínda que este evento non foi o máis relevante organizado dentro de Fortnite, é moi posible que fose un dos que congregou a máis usuarios, xa que os servidores do xogo experimentaron moitos problemas de conexión, dando a entender que posiblemente superaron as marcas anteriores, aínda que os fallos poderían facer complicado estimar o número total de usuarios simultáneos que se xuntaron para poder unirse a unha celebración que confirma que este tipo de iniciativas son unha simbiose de marcas case perfecta, na que ambas partes saen moi beneficiadas.