Fútbol Manager Clicker, o novo xogo móbil de MeigaLabs

O estudio galego de videoxogos MeigaLabs, responsables do xogo móbil Alcalde Corrupto, volven á carga cun novo clicker, xogo de mecánica sinxela que case se limita a dar toques en pantalla sobre certos elementos, pero que desta volta está disfrazado de xogo de xestión de equipos de fútbol, o Fútbol Manager Clicker, que podemos descargar de balde para iOS, para Android e incluso para Windows 10, de xeito que podemos gozar do mesmo en smartphones, tabletas e equipos informáticos, contando incluso con versión en galego.
O xogo, no que principalmente teremos que premer sobre balóns para disparalos a porta e así acumular puntos, permite a fichaxe de xogadores (que irán mellorando nos adestramentos) e permitirá así certos elementos de administración de equipos, podendo incluso xogar partidos e ascender de liga.
Trátase dun xogo apto para todos os públicos, no que resulta moi doado progresar inicialmente, pero que rematará resultando un reto segundo se vaia avanzando no mesmo. Integra unha moeda propia coa que poder adquirir melloras.