Galaxy on Fire 2 para iOS ofrécese de balde durante unha semana

Os amantes de xogos de naves que teñan un iPhone, iPod Touch ou iPad poden descargar de balde entre hoxe e o vindeiro día 14 o xogo Galaxy on Fire 2, tanto en versión normal como en versión HD, aproveitando esta última a potencia dos procesador A5x e A6x dos últimos dispositivos de Apple para amosar uns gráficos mellorados. Este xogo estreouse na App Store en outubro de 2011 e é a primeira vez que pode conseguirse de xeito gratuíto.
Este xogo de ciencia ficción achega uns gráficos 3D propios dunha consola doméstica a dispositivos móbiles, cun son rico e voces que tampouco quedan atrás, e que son un grande complemento para unha mecánica que mestura historia, misións e mundo aberto, mantendo aos xogadores enganchados durante horas. O simulador espacial de Fishlabs conta cunha ampla galaxia con máis de 20 sistemas estelares e máis de 100 planetas e estacións espaciais individuais, máis de 30 naves personalizables e centos de sistemas de armas, melloras e materias primas diferentes.
Entre os motivos que poderían levar a ofrecer este xogo de balde por tempo limitado entendemos que está o feito de que permite compras in-game, polo que estariamos ante unha especie de Free-to-Play temporal, coa diferenza de que quen aproveite esta promoción quedará co xogo por tempo ilimitado, continuando a ser as compras dentro do mesmo unha simple posibilidade opcional.
O xogo tamén conta con versión para Android optimizada para dispositivos con procesador gráfico Tegra, para o Xperia Play de Sonic Ericsson e para OS X (sincronizándose as partidas gardas con esta última versión co resto de entregas para iOS).

Trailer do xogo