Galicia contará con novas ferramentas para acadar unha mellor xestión e ordenación do solo
mércores, 16 de xuño do 2021
A
directora xeral da Axencia Galega de Desenvolvemento Rural, Inés
Santé, participou na mañá deste 16 de xuño en Barakaldo na
primeira edición de Food 4
Future – Expofoodtech 2021. Fíxoo co
relatorio A tecnoloxía, un instrumento de competitividade para as
rexións FoodTech, salientando o peso que teñen a tecnoloxía
e a dixitalización no futuro do medio rural, xunto coa
sustentabilidade e a transición ecolóxica. Neste senso, Inés Santé
puxo en valor varios proxectos tecnolóxicos que desenvolve a
Consellería do Medio Rural en canto á ordenación e xestión do
territorio.
Así,
debullou os detalles do Sistema de Información de Terras de Galicia
(SITEGAL) que permite xestionar o Banco de Terras e que consta dunha
parte pública para que calquera usuario poida consultar as parcelas
incluídas neste banco, saber das características das mesmas e o seu
estado actual. Ademais, salientou, “dito sistema tamén consta
dunha parte privada para a xestión por parte dos técnicos da
Consellería, co fin de dar de alta ou de baixa as parcelas
existentes e, incluso, xerar os correspondentes contratos de
arrendamento”.
Inés
Santé trasladou que na actualidade se está a traballar para
converter o SITEGAL nun sistema máis amplo, “capaz de centralizar
todas as bases de datos, sistemas de información e rexistros da
Consellería do Medio Rural que xestionan información cun compoñente
xeográfico”.
A
maiores, Inés Santé tamén explicou que se está en desenvolvendo
outro sistema de información xeográfica para a participación
pública, como suplemento ao SITEGAL, que consiste nunha aplicación
para os dispositivos móbiles co fin de que as persoas participantes
nos diversos procesos de participación pública poidan deseñar de
forma sinxela a zona ocupada dun posíbel polígono ou aldea modelo e
así saber os usos do solo, as parcelas que se incluirían, a
pendente do territorio, entre outros aspectos.
Durante
a súa intervención, a directora xeral tamén abordou o uso das
novas tecnoloxías para desenvolver dous proxectos que optan aos
fondos Next Generation. Neste senso, destacou as Smart Villages ou
aldeas intelixentes impulsadas pola Comunidade Europea e que “en
Galicia púxose xa en marcha coas coñecidas aldeas modelo”, dixo.
Asemade, abordou as posibilidades do proxecto Rural Dixital 4.0, que
contempla o desenvolvemento de infraestruturas, aplicacións,
ferramentas e sistemas baseados nas TIC e nas novas tecnoloxías, co
fin de alcanzar un territorio intelixente.