Galicia en Común pide ao Goberno un servizo de Internet de calidade para toda a poboación de Gondomar
xoves, 13 de xaneiro do 2022
A
agrupación Galicia en Común rexistrou unha pregunta no Congreso dos
Deputados a iniciativa de Antón Gómez Reino sobre a instalación da
fibra óptica no municipio de Gondomar. Neste documento a formación
fai referencia ao proxecto desenvolvido pola operadora de
telecomunicacións Telefónica para incorporar Internet cunha
velocidade superior a 100 Mbps, unha iniciativa na que “están
incluídas 55 zonas brancas de Gondomar que precisan deste servizo”.
O grupo tamén lembra que a data de finalización para a realización
das obras estaba estipulada para o 31 de decembro de 2021.
A
iniciativa de Galicia en Común ten a súa orixe nas protestas da
organización veciñal Fibra Xa!, que denuncia que “a instalación
aínda non se iniciou e a empresa comezou a cobrar igualmente por un
servizo que a xente non está a recibir”. Ademais, tamén defende
que non se garante a “igualdade de condicións” para todos os
grupos de poboación, xa que hai zonas da localidade de Gondomar que
quedaron fóra do Programa de Extensión de Banda Larga de Nova
Xeración.
Galicia
en Común pediu no Congreso medidas para “garantir que as compañías
telefónicas non cobren polos servizos que non prestan, así como que
se garanta a igualdade de condicións nas novas convocatorias para
todas as zonas que precisen Internet”. En palabras de Gómez Reino,
“a estas alturas o acceso de Internet nas zonas do interior non
debería de resultar un problema para as persoas. A fenda dixital que
existe en Galicia é unha cuestión que temos que resolver o antes
posíbel e quedou demostrado coa chegada da pandemia”.