Galiciencia pon en marcha un concurso de fotografía a través de Instagram
luns, 27 de febreiro do 2023
Galiciencia, a maior feira científica que se
celebra na nosa comunidade (promovida
polo Parque Tecnolóxico de Galicia -Tecnópole- desde o ano 2006 en
colaboración coa Consellería de Economía e a Fundación Española
para la Ciencia y la Tecnología) celebra
este mes de maio a súa 18ª edición
celebrarase co lema Aeronáutica e
Aeroespacial. Para
ir quecendo motores, amais do concurso do proxectos
científico-tecnolóxicos, convocou un concurso de fotografía a
través da rede social Instagram.
Este certame está aberto a todo o alumnado e
profesorado de Secundaria, Bacharelato e FP dos centros educativos de
toda España. Partindo dun enfoque libre e aberto, as fotografías
deben ter como punto de referencia calquera obxecto ou contorna
relacionada coa temática desta edición. O prazo para
presentalas remata o vindeiro 24 de abril.
Todos os que desexen participar neste concurso
deberán seguir o Instagram de Galiciencia. Terán que subir as súas
fotografías etiquetando a Galiciencia co
cancelo #concursogalicienciaonline2023,
así como indicar o título de cada instantánea e mais o centro
educativo ao que pertence o participante.
Poderanse presentar ata tres fotografías tanto en
branco e negro como en cor, e un xurado de expertos decidirá a
proposta gañadora. A resolución farase pública o 12 de maio,
durante o acto de entrega de premios de Galiciencia 2023. Máis
información en www.galiciencia.com.
