Google Reader deixará de funcionar nas vindeiras horas

Hoxe é un día fatídico para moitos usuarios, pois o servizo Google Reader botará o seu peche, o que presenta unha última oportunidade para facer unha copia de seguridade das canles RSS á que un se tiña subscrito (a través de Google Takeout) ou incluso para migrar a algunha das súas alternativas, que en varios casos permiten a importación das nosas subscricións directamente dende o servizo de Google, o que facilita enormemente o proceso.

Feedly está a converterse no principal substituto a Google Reader

Existen moitas alternativas baseadas en aplicacións de escritorio e móbiles, como Reeder, Flipboard, Pulse... aínda que son solucións moi diferentes, e dificilmente recomendables para os que gusten da versatilidade de Google Reader, usuarios que están a optar masivamente por Feedly, servizo que clonou a API de Google Reader, o que facilitou que numerosas aplicacións de terceiros (como Nextgen Reader, Press, gReader ou Meneré) desen o salto a esta plataforma dun xeito case transparente.
Pero hai moitas outras solucións alternativas, como unha páxina web moi semellante a Google Reader (The Old Reader), un lector desenvolvido polos responsables de Digg (que busca engadir valor ás fontes de información) e un moi prometedor AOL Reader (que pese a estar en probas, parece a mellor solución dispoñible despois de Feedly, agardando estrear aplicacións para IOS e Android en breve).
Temos así moitas solucións para deixar de utilizar Google Reader, aínda que haberá que agardar semanas antes de saber cal é realmente a mellor, pois o seu bo funcionamento non depende só das súas prestacións, senón principalmente da dispoñibilidade e velocidade dos servizos, o que non poderá coñecerse ata que topemos con escenarios de uso real por parte de numerosos usuarios orfos do lector de Google.