HBO Max verá a luz nos EE.UU. en maio de 2020

As plataformas de vídeo baixo demanda están en plena revolución, coa estrea de Apple TV+ o vindeiro día 1, seguida o día 12 co lanzamento estadounidense de Disney+ (que probablemente chegue a España dentro dun ano); e finalmente xa sabemos máis do que promete ser o seu grande competidor nos EE.UU.: HBO Max. Esta nova plataforma verá a luz en maio de 2020, con máis de 10.000 horas de contido e un prezo de 14.99 dólares/mes.
HBO Max non será simplemente o que hoxe entendemos por HBO, senón que congregará contidos doutras marcas como Warner Bros, TNT, Crunchyroll, Cartoon Network, Adult Swim, DC, New Line... ou sexa, que sería a grande plataforma dixital de WarnerMedia, que mestura o seu inmenso catálogo cunha serie de contidos licenciados a terceiros, para consolidar unha oferta capaz de competir cara a cara con Netflix, en vez de presentarse como un complemento (como farían o resto de plataformas emerxentes mentres non conseguen ampliar o seu catálogo de contidos).
Esta nova plataforma, que contará con contidos de éxito como Friends, The Big Bang Theory ou South Park, filmes como Joker, e as futuras producións de HBO (como unha precuela de Game of Thrones), tería moi complicada a súa internacionalización, xa que as súas canles están a ser explotadas de xeito moi diverso en cada país, pero dado que estamos ante un movemento estratéxico, nos vindeiros anos podemos atopar como a marca HBO consegue reforzarse como un aglutinador de contidos da Warner, converténdose nun dos grandes actores nas plataformas de streaming, entre as que actualmente aínda non ten peso dabondo.