Hama lanza nova estación multicarga “funcional e versátil”

O fabricante xermano Hama, especializado en accesorios para produtos tecnolóxicos, presentou estes días días a súa nova estación multicarga Powerhouse, un aparello onde se funden “funcionalidade, versatilidade e aforro”, en palabras da compañía, que tamén salienta outro cuarto factor de cara á comodidade do cliente: o factor de poderse despreocupar da obriga de cargar a súa tableta ou teléfono intelixente.
Segundo engade a compañía, a estación é perfecta “para todos aqueles consumidores que por traballo ou por asuntos persoais están na obriga de empregar de continuo varios dispositivos para mantérense conectados, cos problemas de autonomía que isto pode implicar”. O accesorio de Hama posibilita conectar de maneira simultánea até catro aparellos e mantelos cargados “en calquera lugar e intre”.
A nova estación inclúe ademais unha función (Auto-detect) que fai que o circuíto integrado recoñeza os dispositivos, “optimizando desta maneira o proceso de carga dunha maneira personalizada para cada un dos produtos conectados”. Ademais, incorpora unha protección externa de silicona que incrementa, en palabras do fabricante, “a protección dos trebellos cando estes estean conectados”. Á vez, o sistema organizador de cables da zona inferior axudará “a evitar os típicos nós e fará máis cómoda a súa utilización”, engádese.
A estación dispón dunha potencia de 4,8 A e é universal para as distintas correntes eléctricas de todos os países, cun rango de 100 a 240 V. Incorpora cable de corrente, dous cables USB e catro organizadores de cable. O dispositivo xa está dispoñíbel a un prezo recomendado de venda ao público de 54,99 euros.