Importante presenza galega entre os finalistas dos Premios Celtic Media Festival

Un total de dez producións dos medios públicos galegos son finalistas aos Premios Celtic Media Festival 2022, que veñen de facerse públicos na localidade bretoa de Quimper. O Celtic Media Festival promove a cultura e as linguas dos países celtas nos ámbitos do cine, a televisión, a radio e os novos medios de comunicación e ten lugar desde hai 43 anos de forma rotatoria entre Irlanda, Escocia, Gales, Illa de Man, Cornualles e a Bretaña francesa.
Entre estas propostas, cómpre salientar, as dúas candidaturas do popular espazo de fomento do uso do galego da CRTVG #DígochoEu, que presenta Esther Estévez. Ademais de competir no apartado de Formato curto, foi elixido por parte do xurado para participar na categoría Espírito do Festival. A Bretaña francesa albergará tamén a gala de entrega dos premios, entre o 7 e o 9 de xuño.
Nesta edición foron seleccionados os espazos da TVG Malicia Noticias na categoría de Comedia, e no apartado de Factual ou feitos reais, Cos pés na terra. traballar no rural. Tamén son finalistas aos Celtic Media Festival, na categoría de Entretemento infantil a serie de animación galega Tutú, a coprodución galego-portuguesa Ons, participada pola TVG e dirixida polo compostelán Alfonso Zarauza, na sección de Longametraxe.
A TVG tamén aspira a acadar un recoñecemento en Documental con O gran Camiño, produción que recolle as rutas a pé máis relevantes do mundo, entre as que ofrece a do Camiño de Santiago, e na categoría de Series, coa produción internacional 3 Camiños, participada pola Galega.

Mellor emisora e mellor presentador na Radio Galega

A Radio Galega, que pechou o 2021 reforzando o seu primeiro posto como emisora pública de Galicia e cunha marca histórica de audiencia, figura tamén na listaxe de candidaturas ao optar ao premio de Mellor emisora do ano. O locutor Marcial Mouzo tamén destaca entre as candidaturas. O popular condutor do Pensando en ti, emblema das madrugadas en Galicia, en que os oíntes comparten experiencias persoais e opinións, opta ao recoñecemento como Mellor presentador da emisora pública.